Pas një barazimi në kampionat, në derbin ndaj Milanit, e një humbjeje në Ligën e Europës, për Stefano Pioli-n ka mbërritur fitorja e parë që prej uljes në stolin e Interit.
Ndaj Fiorentinës është dukur gjithçka e lehtë për Interin në “Giuseppe Meazza” pas 19 minutave lojë. Interi do të shënonte tre gola të shpejtë, aq sa fitorja u pa si punë e mbaruar. Për më tepër që miqtë mbetën me dhjetë lojtarë pas daljes me karton të kuq të Rodriguez-it.
Golave të Brozovic-it, Candreva-s dhe Icardi-t iu përgjigjën Kalinic e Ilicic me dy realizimet e tyre.
Ikardi i dha fund tensionit të krijuar me golin e tij në mbarim të lojës, i dymbëdhjeti për të në Serinë A gjatë këtij sezoni.
Fitorja 4-2 e ngjiti Interin në vend të tetë në klasifikim, për të lënë pas pikërisht Fiorentinën.
Napoli, që pret të premten Interin, u frenua nga Sasuolo, ekipi i parë në këtë sezon në Seria A me një formacion tërësisht italian në fushë.
Insigne shënoi një supergol tre minuta para mbarimit të pjesës së parë. Defrel i befasoi vendasit kur po afrohej fundi i lojës.
Rezultati 1-1 flet për momentin jo pozitiv të Napolit, ashtu siç flet renditja në vend të shtatë.
Dy takimet e së hënës mbyllën javën e 14-të të kampionatit italian. /tesheshi.com/
