Komisioni i Vettingut ka përjashtuar edhe zyrtarisht ish-kryeprokurorin Adriatik Llalla, i cili ka kërkuar me vullnetin e tij që të mos futet në vetting.
Komisioni i Pavarur i Kualifikimit, me kryetar Roland Ilia dhe anëtar Pamela Qirko e Olsi Komici publikoi vendimin zyrtar.
“Pasi mori dijeni për dorëheqjen e subjektit të rivlerësimit, z. Adriatik Llalla, më datë 12.02.2018, në zbatim të nenit G të Aneksit të Kushtetutës, vendosi ndërprerjen e procesit të rivlerësimit për subjektin e rivlerësimit, Adriatik Llalla.
Vendimi do të publikohet në faqen zyrtare të internetit të këtij institucioni në zbatim të afatit të përcaktuar në nenin 55/7 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, thuhet në njoftimin e KPK-së.
Pak ditë më parë, Llalla informoi Presidentin se heq dorë nga e drejta për t’u emëruar si gjyqtar Apeli.
Ndërsa Departamenti Amerikan i Shtetit një ditë më parë bllokoi hyrjen Llallës në SHBA dhe familjes së tij, duke e vendosur në të ashtuquajturën “lista e zezë” e SHBA-së . /tesheshi.com/
