Asnjë suprizë te emri i kandidatit të LDK-së për kryeministër në zgjedhjet e afërta parlamentare në Kosovës.
Kryetari Isa Mustafa tha në një konferencë për media, pas mbledhjes së Kryesisë së LDK-së se, Hoti e ka drejtuar në mënyrë të drejtë punën e qeverisë dhe ka treguar se ajo zbaton ligjin dhe lufton kundër krimit dhe korrupsionit.
“Qeveria e ka bërë punën mirë në mënyrë të suksesshme duke rivendosur raportet që kanë qenë përpara më SHBA-në, BE-në dhe institucionet financiare si dhe ta kthejë besimin e këtyre vendeve dhe institucioneve karshi Kosovës”, tha Mustafa.
Megjithatë, Mustafa tha se do të kërkojë edhe miratimin e Këshillit të Përgjithshëm të partisë për kandidaturën e Hotit për kryeministër.
Kryeministri në detyrë, Avdullah Hoti tha se gjatë këtyre shtatë muajve, qeveria e udhëhequr prejt tij, ka dhënë prova të sundimit të ligjit, luftimi të korrupsionit dhe rezultate në luftën kundër pandemisë.
Përveç LDK-së, edhe Partia Demokratike e Kosovës (PDK) ka zyrtarizuar kryetarin e saj në detyrë, Enver Hoxhajn, si kandidat për kryeministër.
Zgjedhjet e parakohshme parlamentare në Kosovë vijnë pas vendimit të Gjykatës Kushtetuese të Kosovës, më 21 dhjetor, që vota e Etem Arifit, me rastin e votimit të qeverisë së Avdullah Hotit, më 3 qershor, ishte e pavlefshme, pasi ndaj tij kishte një dënim të formës së prerë me mbi një vit burgim.
Ushtruesja e detyrës së presidentit të Kosovës, Vjosa Osmani, tashmë i ka përfunduar konsultimet me partitë politike. Ajo ka njoftuar se vendimi për shpalljen e datës se kur do të mbahen zgjedhjet e jashtëzakonshme parlamentare, do të merret pas publikimit të vendimit të plotë të aktgjykimit të Gjykatës Kushtetuese. /tesheshi.com/
