Një gjykatë libiane ka dhënë sot nëntë dënime me vdekje, ku mes të dënuarve është i biri i Muammer Gaddafit, Sejfulislami, ish-kryeministri Bagdadi el-Mahmudi, si dhe ish-shefi i shërbimit të fshehtë, Abdullah Senussi.
Akuzat e ngritura kanë të bëjnë me vrasjet gjatë revoltës së vitit 2011, dhe të tre të lartpërmendurit u deklaruan fajtorë për “krime gjenocidi”.
Sejfulislam Gaddafi, i padituri kryesor, nuk ishte i pranishëm në seancë, mbasi që prej kapjes së tij pas vrasjes së të atit mbahet i arrestuar në qytetin perëndimor të Zintanit. Ai ka dëshmuar vetëm një herë në gjyqin që nisi në prillin e vitit të shkuar, e këtë e ka bërë nëpërmjet një videokonference.
Pjesa më e madhe e të pandehurve gjenden në burgjet e kryeqytetin libian, por ca prej tyre mbahen në Misrata.
Sejfulislam Gaddafi kërkohet prej Gjykatës së Hagës me akuzat për krime lufte dhe krime kundër njerëzimit.
Djali i dytë i diktatorit libian, Sejfulislami shihej si pasardhësi i të atit, edhe pse nuk mbante poste shtetërore. Ai u arrestua në nëntor të vitit 2011, por gjithmonë i ka hedhur poshtë akuzat ndaj tij.
Vetë Muammer Gaddafi, i rrëzuar nga pushteti pas rebelimit të 2011-ës, u kap dhe ekzekutua në tetor të po atij viti. Që atëherë Libia nuk ka gjetur më qetësi, ndërsa vazhdon lufta për pushtet ndërmjet grupimeve e milicive të ndryshme. Vendi gjendet në një kaos të plotë, pa asnjë shpresë se konfliktet do të marrin fund së shpejti. /tesheshi.com/
