Një numër i madh të ftuarish, të cilëve u janë bashkuar dhe shumë zyrtarë të administratës qeverisëse kineze, kanë qenë të pranishëm këtë të hënë në ceremoninë e ekspozimit të të parit avion për pasagjerë të prodhuar tërësisht në Kinë.
C919-a, një avion pasagjerësh me dy motorë, që i përket COMAC-ut, korporatës kineze të fluturimeve ajrore, u shpërfaq para të pranishme në Aeroportin Ndërkombëtar të Pudongut në Shangai.
Me nisjen e prodhimit të avionëve për pasagjerë në Kinë synohet të konkurrohen brenda e jashtë vendit prodhuesit e njohur në botë të avionëve.
Kina ka një treg aviacioni që po rritet me të shpejtë, por ai është i mbështetur deri tani te avionët Airbus dhe Boeing. Prodhimi i avionëve kinezë ka për qëllim dhe shmangien e varësisë nga prodhuesit ndërkombëtarë të avionëve.
Prodhuesi kinez i avionëve C919, një ndërmarrje nën varësinë e shtetit, ka treguar se deri tani janë porositur 517 avionë të tillë pasagjerësh nga 21 blerës, më së shumti kinezë.
Avioni C919 ka 158 vende, si dhe një rreze fluturimi prej 4.075 kilometrash. Fluturimi i parë do të kryhet vitin e ardhshëm, për t’u pasuar nga tre vite testimesh në fluturim përpara se të jetë gati për përdorim tregtar, njofton mes të tjerash agjencia zyrtare kineze e lajmeve Xinhua. /tesheshi.com/
