Të tjera detaje janë zbuluar mbi dy shtetasit bullgarë, Aleksandros Doan, 46vjeç dhe Mihaill Karaxhanov, 29 vjeç, të cilët tentuan të vidhnin bankomatin e një banke të nivelit të dytë në Sarandë.
Të dy këta shtetas kanë dalë para gjykatës, e cila vendosi masën e sigurisë me burg. Megjithëse bullgarët kanë mohuar akuzën për vjedhjen e bankomatit, ato kishin si synim instalimin e një kamere, përmes të cilës do të merrnin të dhënat e klientëve për t´i përdorur më tej në kartat e klonuara.
Për të realizuar këtë, bullgarët kishin hapur në bankomatin e bankës së nivelit të dytë vrima deri në 3 mm, brenda të cilave kishin si qëllim të montonin kamera të vogla që të filmonin kodet e kartave të klientëve, raporton BW.
Nga hetimet rezulton se dy bullgarët po silleshin para bankomatit sikur të ishin klientë, duke mos u shqetësuar as nga prezenca e njerëzve në lokalet aty pranë apo nga kalimtarët.
Një polic, ka thënë në sallën e gjyqit që nuk beson se bëhet fjalë për dy persona amatorë duke u nisur edhe nga veprimet e tyre.
Aleksandros Doan deklaroi në sallën e gjyqit se punonte në profesion të lirë, ndërsa Mihaill Karaxhanov vazhdonte ende studimet. /tesheshi.com/
