Në përpjekje për t’i bërë britanikët që ta kuptojnë më mirë Islamin, që të kenë një perceptim më të mirë mbi muslimanët, më shumë se 150 xhami në Mbretërinë e Bashkuar hapën dyert të dielën për vizitorët kureshtarë.
Projekti “Vizito xhaminë time”, në të tretin vit të tij, është një iniciativë për t’iu kundërvënë konceptimeve të gabuara mbi bashkësinë muslimane.
E organizuar nga Këshilli Musliman i Bitanisë së Madhe (MCB), veprimtaria u ofron mikpritje në xhami vizitorëve nga të gjitha besimet, si dhe mundëson përgjigje për pyetjet e ndryshme të tyre në lidhje me Islamin e me muslimanët.
“Ne duam të krijojmë dialog në vend të debatit. Kur debatoni, ju synoni të fitoni një diskutim, por kur përfshiheni në dialog, ju po ndani besimet tuaja,” do të thoshte mbi aktivitetin një zyrtar i MCB-së.
Ndërsa muslimanët përbëjnë pesë për qind të popullsisë të popullsisë së Britanisë, apo diçka më pak se tre milionë njerëz, numri i xhamive që morën pjesë në aktivitetin e djeshëm thuajse u dyfishua nga një vit më parë.
Kreu i laburistëve britanikë, Jeremy Corbyn, do të ishte pjesë e vizitorëve në xhaminë në Finsbury Park. Një përvojë që do ta shtynte të shkruante më pas në Twitter, duke iu drejtuar presidentit amerikan Donald Trump, “Të pish çaj së bashku është shumë më mirë se të ndërtosh mure për të na mbajtur të ndarë.” /tesheshi.com/
