Princi Çarls paraqet një kopje dixhitale të fragmenteve më të hershme të Kur’anit, zbuluar nga universiteti i Birmingamit, në një vizitë që po zhvillon në Emiratet e Bashkuara Arabe. Kopja e dorëshkrimit do të jetë qendra ku do të grumbullohen aktivitetet e një viti që promovon lidhjet kulturore mes Britanisë së Madhe dhe shteteve të Gjirit.
Fragmentet origjinale të Kur’anit, me gjasa më i vjetri në botë, qëndrojnë në universitetin e Birmingamit. Dorëshkrimi, të paktën 1370- vjeçar, vlerësohet si një zbulim madhor.
Zbulimi i universitetit të Birmingamit ndodhi vitin e kaluar kur dorëshkrimi që mbahej prej viteve 1920 u datua me anë të metodës së radiokarbonit dhe u zbulua të ishte shumë më i vjetër nga sa mendohej më parë prej të gjithëve.
Kthimi simbolik
Datimi, vendosur nga testet që u kryen nga universiteti i Oksfordit, tregoi se dorëshkrimi ishte mes më të hershmëve fragmente të mbijetuara të Kur’anit dhe mund të jetë më i vjetri që ekziston aktualisht.
Pergameni me vargje të Kur’anit shkruar mbi lëkurën deleje ose dhie, u shfaq për publikun në Birmingam.
Por, për herë të parë, një kopje dixhitale e dorëshkrimit është nxjerrë jashtë Britanisë së Madhe dhe po del në paraqitje publike në disa aktivitete në Emiratet e Bashkuara Arabe.
Një gjë e tillë është pjesë e një viti bashkëpunimi që promovon lidhjet kulturore dhe ekonomike midis Britanisë së Madhe dhe Emiratave të Bashkuara Arabe në fusha të tilla, si arti, arsimi, sporti dhe shkenca.
Kjo shënon gjithashtu edhe kthimin simbolik, të paktën në formën e një kopjeje, të një dorëshkrimi që është prodhuar në Lindjen e Mesme në vitet më të hershme të besimit musliman.
Hetimet për origjinën e mundshme të dorëshkrimit të Birmingamit treguan se ajo ka lidhje me një dokument të ngjashëm që mbahet në Paris e që është sjellë në Europë nga një nënkonsull i Napoleonit.
Domethënie e rëndësishme
Dorëshkrimi i Birmingamit u ble në vitet 1920 nga Alphonse Mingana, një asirian prej zonës që është sot Iraku modern, udhëtimet koleksionuese të të cilit në Lindjen e Mesme financoheshin nga familja Cadbury.
Zëvendës-kancelari i universitetit, sër David Eastwood, tha se dorëshkrimi i Kur’anit ishte “me një domethënie shumë të madhe për trashëgiminë muslimane dhe studimin akademik të Islamit”.
Por, ai theksoi se mund të ketë “thesare të fshehura” në koleksionin Mingana në universitet, që përfaqëson një nga koleksionet më të mëdha të materialeve të tilla në Europë.
Ka pasur pretendime që fragmentet e Birmingamit janë madje, të një rëndësie edhe më të madhe në historinë e Kur’anit.
Jamal bin Huwaireb, kryemenaxheri për fondacionin Mohammed Bin Rashid Al Maktoum, i themeluar nga drejtuesi i Dubait, tha se ai beson se faqet e zbuluara në Birmingam janë nga Kur’ani i parë i porositur nga Abu Bakir Al Siddiq, kalifi i parë pas profetit Muhamet, që qeverisi midis viteve 632 dhe 634.
“Unë e kam shqyrtuar personalisht këtë pergamenë të lashtë. Në opinionin tim, këto fragmente të Kur’anit të shenjtë ishin shkruar me delikatesë mbi një material special dhe janë prodhuar për dikë të rëndësishëm si kalifi. Ajo që është veçanërisht esenciale është se fjalët në këtë dokument të lashtë përputhen në mënyrë perfekte me fjalët që ne muslimanët lexojmë në Kur’an, në ditët e sotme”, tha bin Huwaireb.
Përgatiti: Juli Prifti – /tesheshi.com/
