Kreu i Kuvendit dhe njëkohësisht një nga aleatët e qeverisë Rama në qeverisje, Ilir Meta e ka cilësuar si të suksesshme vizitën e Kryeministrit në Shtetet e Bashkuara të Amerikës si dhe është shprehur se koalicioni PS-LSI funksionon në mënyrë normale dhe demokratike, duke hedhur poshtë aludimet për një ftohje brenda koalicionit.
“Dëshiroj të përshëndes vizitën e suksesshme të Kryeministrit Rama në Washington dhe takimet me Presidentin Obama dhe zv.Presidentin, Biden. Mesazhet e vizitës janë të qarta. SHBA mbështet rrugën e reformave dhe bën thirrje për thellimin e tyre, veçanërisht në fushën e sundimit të ligjit”, – tha Meta.
Ai shtoi se përshëndet miratimin e Rezolutës për Shqipërinë nga Parlamenti Evropian duke bërë me dije se rezoluta njeh progresin e qëndrueshëm të Shqipërisë në kuadër të reformave dhe 5 prioriteteve kyçe për hapjen e negociatave.
Sipas Metës, rezoluta është një inkurajim për Shqipërinë, Kuvendin, Qeverinë dhe të gjitha institucionet për të vazhduar dhe thelluar reformat dhe përmbushur pa vonesë miratimin e reformës në drejtësi.
Kreu i Parlamentit nuk la pa përmendur edhe vendimin e Partisë Demokratike për t’i dhënë fund marrëdhënies së kushtëzuar me Parlamentin. Meta shprehu besimin në angazhimin konstruktiv të të gjitha palëve për çuarjen përpara të reformave madhore për vendin.
I pyetur për ftohjen brenda koalicionit, kur LSI-ja ka dërguar disa letra në drejtim të kryeministrit Rama dhe nuk ka marrë ende një përgjigje. Meta tha: “Mendoj se koalicioni funksionin shumë normalisht dhe në mënyrë demokratike”. /tesheshi.com/
