Vizita e paralajmëruar e ish-presidentit izraelit, Shimon Peres, në Marok, në kuadër të një konference ndërkombëtare të organizuar nga Fondacioni Klinton, ka shkaktuar zemërim te shumë grupime marokenësh, që u kanë kërkuar autoriteteve të mos e lejojnë atë.
Ish-zyrtari i lartë izraelit u cilësua si “vrasës fëmijësh” dhe “terrorist” në një sërë rrjetesh elektronike, ndërsa Rrjeti Demokratik Maroken i Solidaritetit me Popujt ka kërkuar ndalimin e vizitës së Peresit nga “respekti për ndjenjat e marokenëve dhe për hir të kauzës palestineze”.
Hamasi, lëvizja palestineze, po ashtu i kërkoi Marokut ta shqyrtojë edhe një herë vizitën e Peresit, duke deklaruar se vizita e tij vetëm do ta bënte Izraelin të dukej më mirë para pjesës tjetër të botës.
Ndërkaq, një prej figurave të spikatura të partisë në pushtet në Marok, Partisë për Drejtësi dhe Zhvillim, shprehu distancimin nga vizita e ish-presidentit dhe ish-kryeministrit izraelit.
“Qeveria jonë është e pafajshme për të gjitha akuzat në lidhje me ftesën për këtë sionist, për Shimon Peresin,” bëri të ditur Abdullah Boano, drejtuesi i grupit parlamentar të partisë gjatë një fjale të mbajtur në qytetin bregdetar të Agadirit.
“Ka përpjekje për ta bërë të duket sikur qeveria e ftoi këtë sionist në Marok,” u shpreh Boano, duke akuzuar opozitën se po kërkon të minojë popullaritetin e qeverisë.
Shimon Peres pritet ta vizitojë Marokun për të marrë pjesë në konferencën e parë të Iniciativës Globale Klinton për Lindjen e Mesme dhe Afrikën e Veriut, të planifikuar për në 5 maj në qytetin e Marrakeshit.
Peresi e pati vizituar Marokun shumë kohë më parë, në vitin 1986, kur ai ishte kryeministër. /tesheshi.com/
