Ditë pasi shkaktoi reagime me deklarimin e tij se do vizitonte “qytetin e pushtuar” të Jerusalemit, Princi Uilliam i ka mikluar izraelitët duke u takuar me krenarinë e tyre të këtokohshme, fituesen e Eurosong-ut, Nettom Barzilai.
Të dy ecën së bashku përmes bulevardit “Rothschild” në Tel Aviv dhe pinë nga një lëng në një nga kioskat më të vjetra të kryeqytetit të deridjeshëm izraelit, themeluar si i tillë së bashku me shtetin e ri në ‘48-ën.
Mijëra njerëz u mblodhën për t’i përshëndetur ata rreth gardheve të vendosura nga policia, duke thirrur: “Ne ju duam Uilliam”, raportoi AP.
Duka i Kembrixhit vizitoi një muze, bisedoi me të rinjtë izraelitë, artistë dhe sipërmarrës. Ai ndoqi dhe një ndeshje futbolli në Jafa.
Princi vizitoi gjithashtu Qendrën Përkujtimore të Yale Vashem në Jerusalem dhe u takua me kryeministrin Benjamin Netanyahu dhe presidentin Ruven Rivlin. Axhenda e vizitës së tij do të vijojë me takimin që do të ketë me presidentin Palestinez, Mahmoud Abbas në Bregun Perëndimor. /tesheshi.com/
