Mbreti i Arabisë Saudite gjendet prej së hënës në kryeqytetin turk për një vizitë zyrtare. Dje ai është pritur në pallatin presidencial nga presidenti Rexhep Tajjip Erdogan.
Niveli i lartë i marrëdhënieve është shprehur me Urdhrin e Shtetit, të dhënë mbretit Selman nga presidenti turk. Erdogani e ka ngritur lart në fjalën pasuese rolin e mbretit saudit në forcimin e marrëdhënieve mes dy vendeve.
“Miku im i dashur, ju keni kontribuar shumë për t’i forcuar marrëdhëniet miqësore midis dy vendeve tona që me ngjitjen tuaj në fron. Ju keni treguar vullnet të paepur për t’i forcuara lidhjet miqësore dhe vëllazërore midis dy popujve tanë, që i kanë rrënjët në histori.”
Presidenti turk e ka parë si një mundësi për paqen rajonale dhe globale thellimin e marrëdhënieve mes dy vendeve: “Thellimi i mëtejshëm i bashkëpunimit midis Turqisë dhe Arabisë Saudite në të tëra sferat, falë mbështetjes tuaj, është një mundësi për paqen rajonale dhe globale.”
Nga ana e tij, mbreti e quajti një nder për të e për popullin saudit dekorimin me Urdhrin e Shtetit. “Ky nder reflekton thellësinë e marrëdhënies dhe miqësisë midis dy vendeve tona, të bazuar në parimet e Islamit.”
Gjetja e një zgjidhjeje për konfliktin palestinez, dhënia fund krizës siriane, e bërja ballë përpjekjeve nga vendet e huaja për të ndërhyrë në rajon, u paraqitën nga mbreti Selman si shqetësime të përbashkëta të të dy vendeve.
Erdogani do ta vizitonte Arabinë Saudite në mars të vitit të shkuar, dy muaj pasi qe atje për funeralin e mbretit Abdullah. Dy vendet arritën në dhjetor një marrëveshje për të krijuar një këshill bashkëpunimi strategjik të nivelit të lartë.
Mbreti Selman do të jetë të enjten në Stamboll, ku do të marrë pjesë në një takim të Organizatës së Bashkëpunimit Islam. /tesheshi.com/
