Drejtuesit e institucioneve të Kosovës, presidentja Atifete Jahjaga, kryeministri Isa Mustafa dhe kryekuvendari Kadri Veseli pritën sot një delegacion nga komisioni për politikë të Jashtme i Parlamentit Evropian, i cili kryesohej nga nënkryetarja e këtij parlamenti, Ulrike Lunaçek.
Sipas njoftimit nga Presidenca, presidentja Jahjaga e informoi delegacionin me zhvillimet në vend duke vënë theksin tek proceset dhe reformat që janë duke u zhvilluar e që ndërlidhen me përmbushjen e kritereve për liberalizimin e vizave dhe nënshkrimin e marrëveshjes së Stabilizim-Asociimit.
Ajo po ashtu tha para deputetëve evropianë se sfidat e Kosovës janë të ngjashme me ato të të gjitha vendeve të rajonit që synojnë integrimin në Bashkimin Evropian dhe rikujtoi përkushtimin e institucioneve të Kosovës për tejkalimin e tyre dhe krijimin e kushteve më të mira për të gjithë qytetarët.
Gjatë takimit me deputetët evropianë presidentja Jahjaga foli edhe për procesin e dialogut me Serbinë duke vënë në dukje rëndësinë e implementimit të marrëveshjeve të arritura në këtë proces, pasi që vlerësoi se ka ngecje në zbatimin e tyre në praktikë. Ajo rikonfirmoi qëndrimin e institucioneve të Kosovës për ndërtimin e marrëdhënieve të mira me të gjitha vendet fqinje, përfshirë këtu edhe Serbinë.
Ndërkohë, kreu i Kuvendit, Kadri Veseli e njohu delegacionin me përkushtimin për përmbushjen e kritereve për liberalizimin e vizave, nevojën e nënshkrimit sa më të shpejtë të marrëveshjes së Stabilizim Asociimit dhe zhvillimin ekonomik.
Veseli vuri në dukje se Kosova ka përmbushur detyrimet e veta karshi standardeve për liberalizim të vizave. Ai po ashtu theksoi rëndësinë e procesit të dialogut, si dhe zhvillimit ekonomik. “Është sfidë zhvillimi ekonomik. Sot të rinjtë tanë kanë vështirësi, ngase zhvillimi që vjen nga lëvizja e lirë e njerëzve, ideve dhe mallrave, mbetet ende e kufizuar. Po presim që nënshkrimi i MSA-së të ndodhë sa më shpejt dhe procesi i euro-integrimeve të vendit tonë të vijojë me intensitet”, ka thënë Veseli.
Lunaçek dhe anëtarët tjerë të delegacionit shprehën mbështetjen për proceset integruese që po kalon Kosova . Ajo theksoi se Kosova gëzon mbështetje të fuqishme të deputetëve të Parlamentit Evropian dhe vuri në dukje se zhvillimi ekonomik mbetet sfidë për rajonin dhe më gjerë. /te sheshi.com/
