Nga Blendi Gashi
Kryeministri malazez Dushko Markoviç, më 6 shkurt pritet ta vizitojë Kosovën me ftesë të qeverisë “Haradinaj”, ku pritet të diskutohet për çështjen e Demarkacionit me synim që të arrihet një marrëveshje qoftë e përkohshme, edhe pse ende nuk ka një njoftim nga ekzekutivi kosovar se çfarë konkretisht do të bisedojnë.
Krejt çfarë kanë thënë nga kabineti i kryeministrit Haradinaj është konfirmi i kësaj vizite dhe se po bëhen përgatitjet e duhura për këtë takim.
Ja ç’thonë analistët…
Edhe pse Markoviç e ka pranuar ftesën që të vijë në Kosovë, njohës të zhvillimeve politike nuk mendojnë se kjo vizitë do të çojë në zgjidhjen e çështjes së Demarkacionit.
Gurakuç Kuçi beson se në këtë vizitë kryeministrit malazez do të kërkojë ratifikimin e marrëveshjes nga pala kosovare dhe në një kohë tjetër nëse gjenden fakte të rishqyrtohet ajo.
“Nëse nuk kalohet kjo marrëveshje pas vizitës së kryetministrit të Malit të Zi, qeveria ‘Haradinaj’ do bie dhe do ratifikohet për të mos u rishikuar kurrë më kjo marrëveshje.
Ka gjasa që nëse SHBA-ja dhe BE-ja duanë të shtyjnë vendimin për Demarkacionin në një kohë tjetër gjejnë një marrëveshje ‘Modus Vivendi’ të cilën mund ta paraqes kryeministri malazias dhe kështu nuk i bie që as SHBA-ja dhe BE-ja janë zmbrapsur, por ka një marrëveshje mes dy vendeve dhe me këtë rast Mali i Zi do fitonte poenë si subjekt konstruktiv ndërkombëtar ndërsa Kosova përveç liberalizimit me shumë kushte të vështira për tu plotësuar për një vizë shengen, do ketë penalti në procese tjera. Por, nga plani gjeostrategjik, Mali i Zi është në NATO dhe ajo lartësi bjeshkore i nevojitet sa më shpjet NATO-së që legalisht të vë forca atje. Andaj dyshoj që Kryeministri malazias do bëjë një zmbrapsje nëse nuk ka një presion ndërkombëtar dhe dyshoj që ka një presion të tillë”, thotë Kuçi për tesheshi.com.
Faik Krasniqi thotë se nuk mund të japë një përgjigje të saktë se ç’mund të sjellë vizita e kryeministrit malazez, por shpreson që ky shtet të lëshojë pe.
“Vizita e kryeministrit malazez në Kosovë, mund të shihet si një rrugëdalje për zgjidhjen e çështjes së Demarkacionit, dhe do të ishte gjë e mirë nëse Mali i Zi pranon që në dy vitet e ardhshme pasi ta ratifikoj Kosova, kur të bëhet shënimi i pikës kufitare do ta përforcojë atë që thotë se dokumentet shtesë do të merren parasysh dhe kufiri lëvizë jashtë asaj që është shkruar në marrëveshje. Por mbetet të shihet nëse Mali i Zi ka ndryshuar qëndrim rreth Demarkacionit. Nëse Mali i Zi ka ndryshuar qëndrim, atëherë kjo çështje besoj që do të zgjidhet përfundimisht, dhe Kosova do të bënte një hap të rëndësishëm drejt liberalizimit te vizave, edhe pse ratifikimi i Demarkacionit nuk nënkupton direkt heqjen e regjimit të vizave për qytetarët e Kosovës, sepse kushti kryesor është luftimi i korrupsionit dhe krimit të organizuar”, thotë Krasniqi për tesheshi.com.
Leon Duhanaj thotë se një rinegocim, apo rishqyrtim i marrëveshjes mbi demarkimin e kufirit mes Kosovës dhe Malit të Zi, nuk është i pamundshëm apo i paarritshëm.
“Duhet të kemi parasysh, së pari, cila është mundësia reale për të ndodhë kjo. A jemi ne so shtet, të sigurt në atë që po kërkojmë, a kemi konsensus politik e publik për mënyrën e trajtimit të kësaj çështje. Nuk guxojmë të futemi në tema nderkombëtare me argumente të pabazuara apo fare pa argumente. Duhet ta kemi të çartë se Republika e Malit të Zi dhe pavarësimi i tyre ka qenë faktorë kyç i procesit të pavarësimit të Republikës së Kosovës. Në këtë kontekst, kërkohet maturi dhe përgjegjësi e lartë politike në zhvillimin e marrëdhënieve reciproke”, thotë Duhanaj për tesheshi.com.
Kujtjmë se Komisioni për Punë të Jashtme, Diasporë dhe Investime Strategjike, më 15 janar, ka proceduar në Kuvend projektligjin për demarkacionin me Malin e Zi, pa ndonjë rekomandim që të votohet apo jo. /tesheshi.com/
