Nga Mensur Krasniqi
Vizita e katërshes europiane në Shkup kryesuar nga eurokomisioneri Johanes Hahn, i cili u shoqërua nga Eduard Kukan, Ivo Vajgël dhe Knut Flekenshtajn, nuk ka patur asnjë efekt në ndryshimin e situatës në Maqedoni. Së paku 24 orë pas përfundimit të saj, duke mos dhënë asnjë shenjë se palët kanë ndryshuar qëndrim. Më saktë VMRO-së dhe Presidenca, teksa kjo e fundit nuk pranon të mandatojë liderit e LSDM-së, Zoran Zaev për të formuar qeverinë e re. Dhe kjo ndodh dy javë pas vizitës së Mogherinit, e cila gjithashtu hasi në një rezistencë nga aleanca anti-Platformës Shqiptare, Gruevski – Ivanov, shprehur në qëndrimin refuzues ndaj Zaevit.
Ç’po ndodh dhe pse vizita e katërshes europiane, për më tepër e përbërë prej burrash, përfundoi në një “Mogherini nr.2” prej gruaje?
Sipas botuesit të gazetës “Lajm”, dhe njëherësh analisti politik Fejzi Hajdari, përgjegjësi për këto dështime ka pikërisht gjuha e ndërkombëtarëve.
“Po të kishte qenë më i madh, më adekuat dhe i vazhdueshëm presioni i BE-së kundrejt Gruevskit dhe Ahmetit, që nga fillimi i krizës politike, ekonomike, sociale…, që moti Maqedonia do kishte marrë rjedhë krejtësisht tjetër të zhvillimeve të brendshme politike. Qasja me dy kute e BE-së ndaj Gruevskit dhe opozitës (shih sjelljen e tyre ndaj largimit me dhunë të deputetëve të LSDM-së nga ana e sigurimit të Parlamentit), bëri që qeveria e dyshes Ahmeti-Gruevski, të inkurajohet për ta vazhduar rrugëtimin e thellimit të krizës. Me pak fjalë dua të them se nëse BE-ja në veçanti dhe faktori ndërkombëtarë në përgjithësi, nuk e shton presionin me afate strikte për realizimin e tyre, vajtje-ardhjet e eurokomisarit Hahn dhe BE-së, do të ngelen në dimensionin e tigrit prej kartoni”, deklaroi për tesheshi.com Fejzi Hajdari.
Sipas tij, udhëheqës të tipit të Gruevskit dhe Ahmetit nuk e lëshojnë pushtetin lehtë e aq më pak me metodademokratike.
“Regjimet e tilla rrëzohen o me protesta masive ose me presion të vendosur dhe prerë nga faktori ndërkombëtar. Fatkeqësisht, në rastin e Maqedonisë, nuk po e shoh as të parën e as të dytën. Nuk jam optimist se Hahn me “kompani”, do të mund ta zgjidhin problemi e formimit të qeverisë”, shtoi Hajdari.
Po ashtu, edhe politikologu Murat Aliu vlerëson se BE asnjëherë nuk e luan rolin e duhur në Maqedoni por edhe në përgjithësi në Ballkan. Sipas tij, pozita dhe ndikimi i BE-së në këtë drejtim, fatkeqësisht duket shumë impotente.
“Bindja që BE është impotente kundrejt Maqedonisë, gjegjësisht impotente për të ndryshuar diçka këtu në shtetin tonë, më shtohet akoma më tepër kur kam parasysh krizën në të cilin gjendet vet BE si një organizatë politike dhe ekonomike. Duke u nisur nga kjo, mendoj që pritjet e vizites së z. Hahn në Shkup nuk duhet të jenë maksimale. Këtë e them për 2 arsye. E para është se VMRO-DPMNE si duket shumë herët ka nuhatur impotencën e BE-së për të bërë diç më tepër në Maqedoni. Kurse e dyta është se nëse vizita dhe mesazhet e Mogherinit nuk patën efektin e duhur, atëherë edhe të z. Hahn nuk do të kenë shumë efekt në ndryshimin e bindjes së VMRO-së, gjegjësisht presidentit Ivanov”, tha Murat Aliu për tesheshi.com.
Sa i përket asaj se çka mund të presim më tutje, sipas Aliut, në këso raste vështirë është të parashikohen rrjedhat.
“Por duke u mbështetur në atë që thash më lart dhe në shumë argumente tjera, do të kemi thellim akoma më të theksuar të krizës politike, duke mos përjashtuar edhe mundësinë e ndonjë incidenti intra dhe ndëretnik”, përfundoi Aliu.
Për dallim nga dy bashkëbiseduesit e parë, ish-ambasadori Alajdin Demiri thotë se Hahn preku substancën e krizës politike dhe se zbatimi i rekomandimeve të BE-së do të mundësonte tejkalim sa më të shpejtë të kësaj krize. Mirëpo, ai sërish shpreh pesimizëm, ngaqë këto nuk do të lejohen nga VMRO-DPMNE, meqë sipas tij, vijnë si pasojë e ndryshimit të kursit evropian të saj.
“Porositë e Johanes Hahn drejtuar politikanëve në Maqedoni, janë porosi të cilat në një farë mënyre mund të zgjidhin krizën, ngaqë kanë prekur substancën e krizës së Maqedonisë. Por vlerësoj se sërish këto porosi do të hasin në vesh të shurdhër dhe duhet të kemi të qartë se VMRO-DPMNE me krizën e krijuar tenton të menaxhoje pushtetin e vet; por ajo çfarë është e rëndësishme ka të bëjë me atë se VMRO-DPMNE është duke e ndryshuar kursin e politikës së jashtme e cila kryesisht lidhen me integrimet euro-atlantike, kundër Bashkimit Evropian dhe NATO-s. Nga ana tjetër, Bashkimi Evropian me çdo kusht tenton të fusë Maqedoninë në rrugën këtyre integrimeve, dhe këtu do të mund të vërehet edhe fuqia se sa BE do të mund të mbajë Maqedoninë në ujërat e saj. Por asnjë porosi e Johanes Hahn nuk do të realizohet, ngaqë ashtu dëshiron VMRO-DPMNE”, u shpreh Demiri.
Kujtojmë se porosia bazë e katërshes europiane kryesuar nga eurokomisioneri Johanes Hahn, ishte që “të mos luhet me zjarrin” dhe se presidenti Ivanov ta ndryshojë urgjentisht vendimin për mosdhënien e mandatit Zaevit, duke shtuar se presin qeveri të re. Por shenjat janë që gjithçka ka rënë në vesh të shurdhët, si në rastin me Mogherinin. /tesheshi.com/
.
