Nga Blendi Gashi
Zëvendëspresidenti amerikan, Joe Biden, sot viziton Kosovën me ç’rast do të takohet me krerët kryesorë politikë në vend. Më pas do të marrë pjesë në ceremoninë e emërimit të një rruge me emrin e djalit të tij, Beau Biden, që ka vdekur vitin e kaluar, në moshën 46-vjeçare nga kanceri në tru.
Biden sërish pritet të vërtetojë mbështetjen e parezervë të administratës së presidentit Barack Obama për pavarësinë dhe shtetësinë e Kosovës.
Vizita e zv.presidentit amerikan si nga mazhoranca ashtu edhe nga opozita vlerësohet historike, ku ai përveç konfirmimit të përkrahjes për shtetin tonë, pritet të kërkojë nga institucionet luftimin e korrupsionit e krimit të organizuar.
Kjo vizitë shihet tejet e rëndësishme duke parë edhe krizën politike në vend, pas përplasjeve të mëdha pozitë e opozitë për shënjimin e kufirit me Malin e Zi, marrëveshja e cila më 1 shtator do të votohet ose jo në kuvend.
Por, shtrohet pyetja a do të bisedoi Joe Biden me drejtuesit e shtetit për çështjen e Demarkacionit?!
Opozitarët të cilët nuk do të takohen me zv.presidentin amerikan, nuk besojnë se temë e diskutimeve mes Biden e krerërve të shtetit do të jetë Demarkacioni.
Por mendim krejt ndryshe kanë njohës të rrethanave politike në Kosovë, të cilët vizitën e zv.presidentit Biden e shohin si çelës për ratifikimin e Demarkacionit.
Analisti, Leon Duhanaj, thotë se vizita e zv.presidentit të SHBA-ve është e rëndësisë së jashtëzakonshme për shumë arsye.
Por, sipas tij kjo vizitë në radhë të parë është sinjal i çartë ndaj të gjithë armiqve të Kosovës kushdo qofshin ata, se Kosova ka përkrahjen e parezervë të SHBA-ve, dhe se nuk do t’i lejojë askujt që të sorollatet me fatin e saj.
Sipas Duhanajt, Biden, do t’i përçoj mesazhet e SHBA-së, qoftë ndaj atyre që e kërcënojnë Kosovën nga jashtë, por edhe ndaj atyre që një gjë të tillë e bëjnë nga brenda, duke ndjekur agjenda të dyshimta.
“Biden do të drejtohet me mesazhet për rend dhe ligj, do të kërkoj nga politika kosovare një luftë të pakompromis kundër krimit të organizuar, korrupsionit dhe dukurive tjera negative.
Natyrisht që një ndër çështjet me rëndësi e cila do të jetë temë, është edhe çështja e Demarkacionit, çështje kjo e cila është me interes të zgjerimit të NATO-s dhe që shkon në interes edhe të vetë amerikanëve por, që ka rëndësi të jashtëzakonshme edhe për vetë rajonin dhe trojet shqiptare”, thotë Duhanaj, për tesheshi.com.
Sipas tij, zv.presidenti Biden, poashtudo t’u dërgoj mesazhe edhe partive opozitare me thirrjen që t’i lënë anash politikat e inateve dhe t’u kthehen debateve konstruktive politike.
“Jam i bindur që nga politikanët kosovarë, do të kërkoj më shumë punë dhe atdhedashuri ndaj vendit, e më pakë frazat thata e të pasinqerta patriotike. Më shumë patriotizëm pragmatik, e më pak folklorizëm nacionalist primitiv etj…”, thotë Duhanaj.
Edhe njohësi i rrethanave politike në vend, Arsim Haziri, konsideron se vizita e Biden mund të luaj në rol jetik për vendimin final për çështjen e Demarkacionit që do të merret më 1 shtator nga ligjvënësit.
“Deklarimi i Bidenit mund të jetë vendimtar në ҫështjen e Demarkacionit. Miratimi i ligjit për demarkimin e kufirit me Malin e Zi, do të ndodh, pasi pas avizita e zyrtarit të lartë amerikan do të përkthehet edhe në presionin që do iu bëhet faktorit vendor.
Zv.presidenti Biden vjen me arsyen se çështja duhet ratifikuar që të plotësoshet si kusht politik çështja e lëvizjes së lirë”, thotë Haziri, për tesheshi.com.
Ndryshe, policia e Kosovës ka deklauar se në bashkëpunim me institucionet e tjera relevante, si dhe në koordinim të aktiviteteve bashkëvepruese me strukturat e sigurisë së SHBA-së, që janë përgjegjëse për sigurinë e personalitetit, kanë ndërmarrë masa për ngritjen e nivelit të sigurisë gjatë realizimit të vizitës se Joe Bide. /tesheshi.com/
