Presidenti Erdogan ka shkelur në zyrat e rivalëve të tij më të ashpër politikë, CHP-së, duke u takuar aty me kreun e opozitës kryesore turke, Ozgur Ozel. Ky takim mes një lideri musliman neosman dhe një laiku është realizuar në kuadër të një fryme të re uniteti që po tenton udhëheqësi turk në spektrin politik.
Kjo është rivizita e shumëpritur e presidentit turk, pas takimit që dy politikanët patën më 2 maj në zyrat e Partisë për Drejtësi dhe Zhvillim (AKP) në pushtet, në kuadër të “procesit të normalizimit” të jetës politike turke, deklaruar nga të dyja palët pas zgjedhjeve lokale të 31 marsit. Ishte kjo vizita e parë e Erdoganit në zyrat e CHP në 18 vjet, prej kur është në pushtet, më herët dhe si kryeministër.
Takimi Erdogan-Ozel zgjati rreth një orë e gjysmë pa deklarata për përfaqësuesit e shtypit nga dy liderët politikë.
Por përfaqësuesi i AKP-së, Omer Çelik, në deklaratat e tij pas takimit tha se presidenti Erdogan ngriti çështjen e rishikimit të Kushtetutës me konsensusin sa më të gjerë politik dhe diskutoi çështje që lidhen me ekonominë.
Sipas Çelik, presidenti turk i kërkoi Ozgur Ozelit të tregojë unitet dhe solidaritet të fortë me partitë e tjera në kuadër të 50-vjetorit të pushtimit të Qipros. Ai tha gjithashtu se “është e rëndësishme të forcohet bashkëpunimi në periudhën e ardhshme dhe t’i përgjigjemi rritjes së së djathtës ekstreme në Evropë. Zoti President deklaroi se duhet të ndërmarrin veprime të përbashkëta kundër këtij fashizmi në zhvillim”.
Një çështje tjetër e diskutuar, sipas zëdhënësit të AKP-së, ishte lufta në Gaza. “Ne si parti politike duhet të mbajmë një qëndrim të përbashkët kundër politikës së gjenocidit në Gaza dhe të forcojmë ndjeshmërinë tonë në raport me shtetin palestinez”.
Duke parë këtë risi të Erdganit, si fryme e re e një etike politike, kujtojmë premtimin e mikut të tij Edi Rama para se të vijë në pushtet, pikërisht në lidhje me etikën e re politike që ai do sillte. Rama tha se në kushte pushteti do takohej një herë në javë me kreun e opozitës, pa e ditur se kush do ishte ai, pra pa thënë ndonjë emër, duke u pëqendruar te posti e akti. Ndodhi ai të qe Lulzim Basha, por veç një marrëveshjeje mes tyre katër vjet më pas, më 17 maj 2017, në një moment delikat të krizës politike të Çadrës, mes tyre nuk pati asnjë lloj takimi ashtu siç Rama kishte premtuar. /tesheshi.com/
