Vizita e kreut të diplomacisë së Tiranës, Ditmir Bushati në Iran, ka zgjuar një interes të veçantë nga mediat e vendit të madh në Lindjen e Mesme.
Agjencia e lajmeve Parstoday, e cila ka edhe një edicion të posaçëm në gjuhën shqipe ka braktisur sulmet ndaj qeverisë shqiptare, që thuajse e ka pasur të përditshme që prej ardhjes së muxhahidinëve opozitarë të MEK në Shqipëri. Prej disa ditësh në faqet e saj janë harruar artikujt fshikullues dhe flitet për një “erë të re” në marrëdhëniet dypalëshe.
Po çka ndodhur? Ajo që duhet thënë është se kemi të bëjmë me një zhvillim të rëndësishëm, pasi Irani është përveç të tjerave një nga aleatët më të ngushtë të Rusisë në rajonin e Lindjes së Mesme.
Ambasadori më i ri i Shqipërisë në Turqi, Gent Gazheli, i dërguar posaçërisht nga kryeministri Rama për të zhvilluar marrëdhëniet me Ankaranë, mbulon përveç të tjerave edhe Teheranin, ku Shqipëria nuk ka ambasadë.
Gazheli ka përgatitur vizitën e Bushatit, e cila është e para prej thuajse 25 vitesh.
Ajo që vlen për t’u theksuar është se kjo lëvizje bëhet paralelisht edhe me lëvizjet e Turqisë dhe presidentit të saj, Erdogan, që gjithashtu ka normalizuar dhe afruar relacionet me Teheranin dhe Rusinë.
Duket se po përjetojmë zhvillime të reja gjeopolitike që kanë ndryshuar në botë, edhe nga realiteti i ri në SHBA që pritet të ndodhë pas marrjes së detyrës së Presidentit Donald Trump.
Çdo të thotë kjo lëvizje e re diplomatike e qeverisë së Edi Ramës?
Sipas të gjitha gjasave bëhet fjalë për një linjë që shkon tangent ose afër edhe lëvizjeve diplomatike të Turqisë, e cila është një aktor thelbësor në Ballkan dhe që prej 2013-ës është përcaktuar si aleat strategjik i Shqipërisë.
Në muajt e ardhshëm do të përkthehet më qartë kjo linjë politike, por sipas të gjitha gjasave do të kemi një trajektore të re, e cila normalisht që e konsideron Rusinë si një aktor tashmë të fuqizuar dhe me kredenciale të rritura.
A po afrohet Tirana me Moskën si rregull treshi? Logjika ta thotë po; por duhet pritur, sidomos pas datës 20 në Uashington kur Trump të nisë punën dhe të shpallë prioritetet e politikës së jashtme.
Këtë e thotë edhe ministri i jashtëm shqiptar, Ditmir Bushati, në intervistën dhënë për Parstoday.
Aty ai potencon interesat e Shqipërisë në këto marrëdhënie kur thotë se “përsa i përket potencialit, ne besojmë se ekziston mundësia për përfitime të ndërsjella kryesisht në fushën e gazit, energjisë, turizmit dhe produkteve bujqësore dhe shpresojmë shumë që duke punuar së bashku me qeverinë iraniane ne do të krijojmë një platformë dhe një kuadër ligjor lehtësues për kontakte më të mëtejshme të sektorit privat”.
Dhe kjo ndodh ndërsa Tirana kreu aktin kurajoz të strehimit të mbi 2 mijë muxhahidinëve të opozitës iraniane me kërkesë të Uashingtonit, duke riskuar mjaft në raportet me një vend të fuqishëm, grindavec dhe kërcënues si Irani. /tesheshi.com/
