Parlamenti shqiptar është rimbledhur sërish pas një periudhe ndëprerjeje për shkak të krizës koronare, ku veç maskës në fytyrë, deputetët u shfaqën të larguar nga njëri-tjetri.
Interesant ka qenë fjalëmbajtja e kryeparlamentarit Ruçi, ku shpalosi Shqipërinë post-koronare.
Në gjykimin e tij, nga kjo krizë, Shqipëria ka shansin e madh për t’u bërë preferuar nga investitorë të huaj.
“Shqipëria është një vend i vogël dhe jemi aq modest sa të mos i japim mend njerëzimit dhe as t’u imponohemi fuqive dhe ekonomive të mëdha të globit.
Por disa mësime nga pandemia, me të cilën jemi ende në luftë, për vete duhet t’i nxjerrim”, tha Ruçi.
E para, jetën dhe shëndetin duhet t’i përkushtohemi më shumë dhe të mos i marrim si të mirëqena. Jeta na është dhënë për ta gëzuar dhe saj duhet t’i shërbejmë me veprimin e qytetarëve dhe investimin e shoqërisë. Prandaj shëndetësia duhet të përbëjë më shumë se deri tani, një prioritet të qeverisjes dhe investimit tonë politik e kombëtar.
E dyta, shoqëria, forcat politike, Kuvendi, Qeveria e institucionet duhet të korrigjojmë disa prioritete të zhvillimit, mënyrën sesi e konceptojmë dhe e zhvillojmë raportin midis rritjes ekonomike dhe shëndetit. Politikat tona duhet ta bëjnë të qartë se shëndeti i popullsisë është qëllimi madhor i rritjes ekonomike dhe jo një ushqyes dhe në shërbim të saj.
E treta, brenda sistemit shëndetësor, duhet të korrigjojmë disa prioritete.
E katërta, kjo situatë duhet të na udhëheqë drejt ripërcaktimit të statusit të mjekëve, infermierëve e profesionistëve të shëndetit.
E pesta, kjo situatë ka shtruar emergjencën e përmirësimit të edukatës shëndetësore, epidemiologjike e parandaluese të popullsisë. Kundër epidemisë, secili duhet të bëhet mjek i vetvetes. Por detyra jonë është të krijojmë kushtet dhe hartojmë programet shkollore që çdo qytetar të bëhet i tillë. Ashtu si shtruam nevojën e edukimit anti-sizmik pas tërmetit të 26 nëntorit”, tha Ruçi, i cili pas 5 pikave, erdhi te e 6-ta, aty ku shpalli vizionin e një tjetër Shqipërie pas kësaj krize globale.
E gjashta, situatën pas kësaj pandemie globale mund ta shndërrojmë në një oportunitet kombëtar. Shanset janë që të dalim nga kjo pandemi si një ndër vendet e sigurta të planetit. Kjo mund të sjellë një qasje të re të vendeve të zhvilluara për të investuar në Shqipëri dhe ne duhet të mendojmë për politika agresive për tërheqjen e këtyre investimeve“, tha njeriu i fuqishëm i mazhorancës dhe politikës shqiptare. /tesheshi.com/
