Kryeministri i Maqedonisë së Veriut, Dimitar Kovaçevski, tha se ai është një “optimist racional” dhe se beson se anëtarësimi i plotë i vendit të tij në Bashkimin Evropian deri në vitin 2030 është një qëllim ambicioz, por i arritshëm.
Në një intervistë për agjencinë shtetërore MIA, të cilën e transmetoi Qeveria, Kovaçevski kujton se Maqedonia e Veriut filloi negociatat me BE-në më 19 korrik dhe mbajti konferencën e parë ndërqeveritare, se procesi i shqyrtimit filloi më 15 shtator dhe se nënshkroi Marrëveshjen më 26 tetor për Frontex, që është dokumenti i parë i nënshkruar së bashku me të 27 anëtarët e BE-së, në gjuhën maqedonase, pa asnjë shtesë, yll dhe fusnotë.
“Me këto tre data, ne kemi filluar një kapitull të ri në rrugëtimin tonë evropian dhe po shkojmë drejt anëtarësimit të plotë në BE. Ne morëm vendime shumë të vështira, por edhe treguam vizion, lidership dhe guxim, sepse e gjithë kjo do të thotë realisht një mundësi për një të ardhme më të mirë, më të pasur, një standard më të mirë jetese për qytetarët, mundësinë që fëmijët tanë të jetojnë në BE… dhe këtu në Maqedoninë e Veriut”, tha Kovaçevski. /tesheshi.com/
