Arabia Saudite ka bërë me dije prohjektin e saj për ndërtimin e një “qyteti argëtues” me sipërfaqe prej 334 kilometra katrorë në jug të kryeqytetit Riad, i cili do të ketë objekte sportive, kulturore dhe rekreative, përfshirë një park argëtues dhe një kopsht zoologjik të quajtur Six Flags.
Fondi i Investimeve Publike të Mbretërisë do të jetë investitori kryesor në këtë projekt, puna për ndërtimin e të cilit do të fillojë në vitin 2018 dhe që pritet të hapet në vitin 2022, sipas një deklarate nga Mohammed bin Salman Al Saud, zëvendës-Princi i kurorës.
“Me vullnetin e Zotit, ky qytet do të bëhet një pikë referimi i njohur kulturor dhe një qendër e rëndësishme për plotësimin e nevojave rekreative, kulturore dhe sociale të brezave të ardhshëm në Mbretëri,” tha Mohammed në një deklaratë.
Korporata Six Flags me seli në SHBA, ka njoftuar në qershor të vitit të kaluar se kishte nisur bisedimet me qeverinë saudite për të nisur ndërtimin e parqeve për argëtim si pjesë e projektit të Arabisë Saudite “Vision 2030”, për të zgjeruar sektorin e saj argëtues dhe për të diversifikuar ekonominë.
Jim Reid-Anderson, shefi ekzekutiv i Six Flags, tha më vonë se kompania kishte për qëllim që të ndërtojë tri parqe në Arabinë Saudite, ku secila prej tyre kushton midis 300 dhe 500 milion dollarë.
Programi për reforma “Vision 2030” përmban plane për të zbutur reputacionin e rreptë të Arabisë Saudite, për të reduktuar varësinë e saj nga nafta dhe për të krijuar vende pune për të rinjtë. /tesheshi.com/
