Ndërsa të gjithë krerët e Kosovës thonë se këtë vit do hiqen vizat, këtë e mohon partia opozitare Vetëvendosje.
Deputetja e kësaj partie, Fitore Pacolli në një konferencë për media të mbajtur të enjten ka folur për siç tha, një takim që ka zhvilluar Komisioni kuvendar për integrime evropiane me Zyrën e Bashkimit Evropian në Prishtinë, në të cilin, sipas deputetes, kanë marrë sinjale se sivjet nuk do të ketë liberalizim vizash.
“Sapo u ktheva nga një takim që e kishim më përfaqësues të Zyrës së BE-së për të diskutuar rreth përmbushjes së kriterit të luftimit të korrupsionit, për liberalizim të vizave. Nga ajo që pamë është tashmë e sigurt që nuk do të ketë liberalizim të vizave sivjet dhe është shumë e qartë që Kosova nuk ka bërë ndonjë hap konkret sa i përket luftimit të korrupsionit dhe krimit të organizuar”, ka thënë Pacolli.
Deputetja e VV-së ka thënë se përfaqësuesit e Zyrës së BE-së shpresonin se do të merrnin propozim pozitiv nga Komisioni Evropian, mirëpo sipas saj Kosova nuk ka bërë mjaftueshëm për përmbushjen e kushtit të fundit për vizat, pra luftimit të korrupsionit.
Por këto deklarata i ka mohuar deputetja e PDK-së, Deliu-Kodra, e cila është kryetare e Komisionit kuvendar për integrime evropiane sipas së cilës nga Zyra e BE-së, kanë thënë se presin rekomandim pozitiv për liberalizimin e vizave.
“Nuk është e vërtetë ajo që ka thënë Fitorja. Na kanë thënë që presin rekomandim pozitiv për liberalizim në qershor”, ka thënë Deliu-Kodra. /tesheshi.com/
