Nga Blendi Gashi
Kryeministri Isa Mustafa dështoi ta bindë Bashkimin Evropian që të suspendojë me kusht për dy vite ratifikimin e marrëveshjes së Demarkacionit me Malin e Zi, që fillimisht të bëhet liberalizimi i vizave për kosovarët.
Ndërsa, në rast se vendi nuk përmbushë kërkesën e Komisionit Evropian për ratifikimin e Demarkacionit, atëherë të kthehet sërish regjimi i vizave.
Njohësit e integrimeve iniciativën e Mustafës e shohin të vonuar, ndërsa opozita dhe analistë një lojë dhe dështim të radhës të tij.
Besa Shahini, njohëse e integrimeve evropiane thotë se iniciativa e kryeministrit nuk ka qenë e gabuar, por ka qenë definitivisht e vonuar.
“Për mua ka qenë e qartë që nuk do të rezultoj e suksesshme tani. BE do të duhej të tërhiqej nga kjo kërkesë, por, edhe nëse e bën këtë gjë, nuk pritet ta bëj shpejt. Do të marrë vite të tëra lobimi që të arrihet diçka e tillë”, thotë Shahini për tesheshi. com.
Ajo përmend disa raste në të kaluarën që Komisioni Evropian është tërhequr taktikisht nga kërkesat jo-relevante.
“E ka lidhur procesin e aplikimit të Bosnjës për anëtarësim në BE me rregullimin e çështjes së zgjedhjes së presidentit, pra kalimi nga presidencë etnike në qytetare. Bosnja nuk ka mundur ta zgjidhë këtë çështje për shkak të ndërtimit të komplikuar kushtetues kështu që BE heshturazi ka hequr dorë nga kjo kërkesë”, shprehet Shahini.
Shkodran Hoti, zyrtar për media në Vetëvendosje thekson se përpjekja e Isa Mustafës nuk është asgjë më shumë sesa një lojë e tij për të mbuluar dëmin nga stërzgjatja e diskutimit mbi marrëveshjen për Demarkacionin, e cila sipas tij është krejt pasojë e arrogancës së këtij njeriu.
“Demarkacioni në versionin aktual ka marrë fund në shtatorin e vitit që shkoi dhe e vetmja zgjidhje mbetet kthimi i tij në pikën zero, por duket se Mustafa nuk mund ta bëjë tashmë as këtë sepse nuk ka as vullnet e as dije. Prandaj, zgjidhja mbetet tek dorëheqja e kësaj qeverie”, thotë Hoti për tesheshi. com.
Edhe analisti politik Islam Krasniqi, e quan lojë të kryeministrit kërkesën e bërë së ndaj BE-së, duke thënë se me Demarkacionin e fundosi vetën sepse besoj se i ka numrat për ta ratifikua.
Sipas Krasniqit, kryeministri Demarkacionin si kusht për lëvizje të lirë të qytetarëve e përdori për ta mbuluar turpin e koalicionit qeverisës.
“Kjo inciativë e z. Mustafa u bë më qëllim të fushatës zgjedhore, të cilën partneri i koalicionit të tij e ka filluar tash e sa kohë. Duhet cekur së ky veprim i kryeministrit është edhe një dështim i radhës i tij që tregon se si merr vendime ai së bashku me njerëzit për rreth, sikur të ishin të verbër, pa menduar fare dhe pa u konsultuar me askend, vendime që nuk përkrahen as nga bashkëpartiakët e tij”, thotë Krasniqi për tesheshi. com.
Kujtojmë se komisioneri Dimitri Avramapulos i ka kërkuar Mustafës që qeveria sa më parë ta procedojë në Kuvend marrëveshjen për Demarkacionin, ndërsa ka shprehur mbështetjen e tij për Kosovën në fazat e fundit drejt liberalizimit të vizave, derisa ka paralajmëruar një para verës. /tesheshi.com/
