Të mërkurën, Presidenca e Këshillit të Bashkimit Evropian dhe Parlamenti u pajtuan për projekt-rregulloren për udhëtimin pa viza për qytetarët e Kosovës.
“Teksti i rënë dakord tani duhet të miratohet nga Këshilli dhe Parlamenti Evropian përpara se të kalojë në procedurën formale të miratimit,” tha Këshilli Evropian në një deklaratë.
Rregullat e reja do të lejojnë mbajtësit e pasaportave të Kosovës të udhëtojnë në BE pa viza për 90 ditë në çdo periudhë 180 ditore.
Ky përjashtim nga kërkesa për vizë do të zbatohet nga data e fillimit të funksionimit të Sistemit Evropian të Informacionit dhe Autorizimit të Udhëtimit (ETIAS), dhe në çdo rast maksimumi deri më 1 janar 2024.
Zyrtarët e lartë të Kosovës kanë nënshkruar të mërkurën aplikacionin zyrtar për anëtarësim të vendit në Bashkimin Evropian.
Aplikacioni i nënshkruar do t’i dërgohet Republikës Çeke, e cila aktualisht mban presidencën e Bashkimit Evropian. /tesheshi.com/
