Shefja e Zyrës së Bashkimit Europian në Kosovë, Nataliya Apostolova, ka përçuar dhe njëherë mesazhin e mospajtueshmërisë me taksën doganore ndaj Serbisë.
Ajo u tregua diplomatike kur tha se “ne e kuptojmë taksën 100 për qind, mirëpo koha ka ardhur të shikohet se çfarë është me rëndësishme për Kosovën. Ne i bëjmë thirrje kryeministrit që ta rishqyrtojë edhe një herë taksën, të ketë fotografi më të gjerë, dhe të ketë finalizim sa më të shpejt të dialogut”, deklaroi Apostolova.
Sipas saj, Prishtina duhet të jetë më e ndjeshme ndaj disa faktorëve për masën e saj që e vijon ende, e për këtë ka plot arsye.
“Bashkimi Europian, si investuesi më i madh në Kosovë dhe partneri më i madh tregtar, është mjaft i shqetësuar. Ndaj thekson se këto barriera ndaj tregtisë së lirë, qoftë të vendosura nga Kosova, apo ndonjë shtet tjetër fqinj, pengojnë rrugën rajonale të integrimit ekonomik. Po ashtu, e bëjnë vendin jotërheqës për investimet e huaja”, tha Apostolova.
Ndërkohë, gruaja që përfaqson Brukselin në Prishtinë, kërkoi durim përsa i përket vizave, duke premtuar një fund të lumtur.
“BE është zotuar se lëvizja e lirë do të jetë prioritet i dialogut. Kosova ka bërë progres në luftimin e korrupsionit. Vota e PE-së është dëshmi që keni përparuar. Procesi duhet të zhvillohet, dhe është në dorën e këshillit. Mos u zhgënjeni sepse nuk është duke u zhvilluar në shpejtësi, nuk bëhet automatikisht. E ndjejmë një lloj dhimbje, porosia ime është qe të vazhdoni në këtë rrugë të drejtë, ruani këtë progres, jam e sigurt që do të ketë një fund të lumtur”, deklaroi ambasadorja e BE-së në Kosovës. /tesheshi.com/
