Nga Blendi Gashi
Raportet e tendosura me Ambasadën Amerikane që lidhen me tentimin për shfuqizimin e Gjykatës Speciale, si dhe këmbëngulja në dështimin e marrëveshjes së Demarkacionit, duket se kryeministrit Haradinaj po i hakmerren nga Uashingtoni zyrtar.
Mediet e Prishtinës së fundmi kanë raportuar për një refuzim që thuhet se SHBA i ka bërë kërkesës për vizë të Ramushit në SHBA, konkretisht me datë 4 shkurt në Lutjet e Mëngjesit.
Se është në pritje të vizës për të vizituar më pas Amerikën e ka konfirmuar edhe vet Haradinaj.
“Më 24 mars ‘98 kemi pasur momente jete apo vdekje. Kështu ka vazhduar deri më 24 mars ‘99, kur Amerika dhe NATO na dolen në ndihmë. Kurrë nuk do ta harroj. Momente të vështira pritje deri më 24 mars ‘99. Pres edhe për vizë deri kur të ma japin. I besoj Kosovës! I besoj Amerikës! Jam ende në procedurë për vizë”, shkruan kryeministri në Facebook.
Kjo çështje më pas u bë mollë sherri pasi opozita kërkoi dorëheqjen e Ramushit, veç nëse del i vërtetë lajmi që i është refuzuar viza, ndërsa gruaja e kryeministrit u kap me mediat që raportuan duke i krahasuar me mediat e Beogradit.
E gjitha nisi kur vetëvendosësja, Donika Kadaj- Bujupi ish-zyrare e lartë e AAK-së kërkoi dorëheqjen e ish-shefit të saj, Haradinajt.
“Nëse me të vërtetë i është refuzuar viza nga SHBA-të kryeministrit, këtij të fundit nuk i mbetet gjë tjetër veç dorëheqjes. Dështimi i qeverisjes së vendit në mënyrë koherente me SHBA-të në fazën në të cilën gjendet vendi ynë është dëm i madh dhe çdokush që ka pjekuri shtet-formuese dhe ndjenja patriotike do të duhej të largohej nga skena politike për t’iu dhënë rast njerëzve të rinj e ide të reja, kreativitetit dhe më së shumti mençurisë shtet-formuese, ashtu që kombit tonë t’i hapen rrugët dhe të dalë nga izolimi i krijuar nga udhëheqës të papërgjegjshëm për gati dy dekada”, shkruan Kadaj-Bujupi në Facebook.
Ndaj saj reagoi, deputetja e AAK-së, Time Kadrijaj e cila kritikoi ish-kolegën e saj partiake duke i thënë se ajo u ngrit në politikë falë Ramushit.
“Paska fol Donika. E moj Donikë nuk ke faj ti, po faj ka AAK që të sjelli këtu ku je duke të priveligju në çdo aspekt, e ti sot del e fol pikërisht për atë njeri që t’i dha krejt, e sa për temën në fjalë ishe edhe ti kundër kësaj Gjykate (Speciales). Kryeministri s’ka bërë gjë tjetër vetëm se po i ruan qëndrimet e ma hershme. Se kush është ‘pro’ Amerikës, Ramush Haradinaj ma shumë se kushdo tjetër e ka dëshmu këtë dhe ne do vazhdojmë të besojmë të pa lëkundur në miqësinë e përhershme me SHBA-të, Ishte pikërisht Kryeministri që kërkojë që në tavolinën e Brukselit të jetë pjesë edhe Amerika. Ishte pikërisht kryeministri që projektin ma të madh të pas luftës në investime ju jepet pikërisht kompanive amerikane. Donikë, kur e han piten, tepsija mbetet”, shkruan Kadrijaj.
Gruaja e Ramushit fyen mediat
Ndaj lajmeve për vizën e Haradinajt ka reaguar edhe gruaja e tij, Anita Haradinaj. Ajo nuk është përfshirë në përplasjen mes dy ish-kolegeve të AAK-së, por është marrë me mediat.
Anita e cila është vet pjesë e mediave pasi punon si prezantuese e lajmeve në RTK, ka krahasuar mediat kosovare me ato të Millosheviçit, pasi e ka përmendur “Tanjugun” si krahasim.
“Qy qy Kryeministrit me dy pasaporta me iu refuzu visa ????, kur po doni po thoni ti lehtë e ke për viza, kur po doni po thoni iu refuzu, bravo bre si Tanjugu jeni bo ???????? hajde gazetari hajde”, ka shkruar Anita Haradina, e cila më pas e ka fshirë postimin. Nuk ka dhënë sqarime se pse ka bërë një veprim të tillë.
Kujtojmë se vitin e kaluar, pikërisht në këtë kohë, bashkëshortja e Haradinajt, Anita, kishte bërë të ditur se kishin marrë vizat për SHBA, megjithatë Ramushi atë kohë mbahej në Francë sipas një fletarresti të lëshuar nga Serbia.
Në Lutjet e Mëngjesit vitin e kaluar ka marrë pjesë kryeparlamnetari, Kadri Veseli, ku takoi edhe presidentin e SHBA-ve, Donald Trump.
Po ashtu, viteve të kaluara në këtë ceremoni kanë shkuar edhe deputetë dhe zyrtarë tjerë shtetërorë të Kosovës, duke mos iu refuzuar askujt viza.
Mbetet të shihet ditëve në vijim nëse Haradinajt do i lëshohet viza, apo SHBA do i “hakmerret” për Gjykatën Speciale, të cilën partia e tij AAK-ja po e mbështet të shfuqizohet edhe përkundër paralajmërimit të Departamentit Amerikan të Shtetit të mos ndodhë një gjë e tillë pasi pasojat do jenë të mëdha. /tesheshi.com/
