Kosova regjistroi të tjera raste infeksioni mekoronavirus, duke e çuar numrin e përgjithshëm në 13.
Dhe, siç sqaroi ministri i Shëndetësisë, rastet e fundit lidhen me një të prekur nga fshati Stubëll i Vitisë, aty ku u identifikua fillimisht një 77-vjeçar i kthyer nga Italia.
“Sipas informatave të fundit që i kemi marrë janë shtuar edhe katër raste dhe tani numri ka shkuar në 13 në Kosovë. Janë familjarë të ngushtë të pacientit të identifikuar në Viti. Ata po qëndrojnë të vetizoluar dhe janë në gjendje shëndetësore të mirë”, tha ministri , Arben Vitia, që për një koinçidencë ironike, mbiemri i korrespondon me vatrën kryesore të COVID-19 në Kosovë.
Ai lëshoi me këtë rast një tjetër thirrje për vetëizolim.
“Siç jeni informuar, pas masave fillestare, kemi marrë edhe masa shtesë siç është mbyllja e kufijve tokësorë dhe situata emergjente e shëndetit publik.
Qytetarët në këtë rast janë po aq të nevojshëm dhe ndihma e tyre është e domosdoshme që të parandalojmë përhapjen e virusit. Ndihma e tyre është më e madhe se ndihma e institucioneve. Qëndroni në shtëpi së paku për dy javë. Me sa pashë dje qytetarët kanë filluar të vetdijësohen dhe kjo tregon një kulturë të lartë. Kjo situatë do të kalohet më shpejt me ndihmën e tyre”, tha kreu i shëndetësisë kosovare, Arben Vitia. /tesheshi.com/
