Zyrtarët e qeverisë gjermane njoftuan se po hetojnë një rritje të paprecedent të lajmeve të rreme midis raportimeve që vijnë nga shumë burime se rusët po përpiqen të ndikojnë në zgjedhjet e përgjithshme në këtë vend që pritet të mbahen këtë vit.
Agjencia e brendshme e shërbimeve sekrete konfirmoi se sulmi kibernetik i dhjetorit të kaluar kundër organizatës për Siguri dhe Bashkëpunim në Europë kishte pasur të “njëjtën infrastrukturë” sikundër edhe një hakerim i 2015-ës mbi parlamentin gjerman që iu atribuua grupit të hakerave rusë, APT28.
Muajin e kaluar, agjencia tha se ka konstatuar “një përdorim të stërmadh të burimeve financiare” dhe punësimin e një varieteti të gjerë të mjeteve të propagandës ruse për të ndërmarrë fushata keqinformimi me synim detsabilizimin e qeverisë gjermane.
Në fakt, Rusia e mohon përfshirjen e saj në luftën kibernetike që ka shënjestruar qeveritë dhe institucionet perëndimore.
Steffen Seibert, zëdhënës në qeverinë gjermane, tha se Gjermania do të përdorë të gjitha mjetet e mundshme për të hetuar përhapjen e lajmeve të rreme online, duke thënë se përgjigja më e mirë ishte një transparencë më e madhe.
“Po përballemi me një fenomen në dimensione që nuk i kemi parë ndonjëherë më parë”, tha ai.
OSBE ka 57 anëtarë përfshirë Rusinë dhe Shtetet e Bashkuara, të cilat kanë deklaruar se ka qenë shënjestër e një sulmi kibernetik muajin që shkoi, por duke refuzuar të konfirmojnë se pas këtij sulmi qëndronte grupi i hakerimit rus APT28.
Duke komentuar sulmet kibernetike, zëdhënësi i ministrisë së Jashtme gjermane, Martin Schaefer tha: “Ne po i marrim shumë seriozisht sulmet e mundshme kundër OSBE-së, sikundër po marrim shumë seriozisht edhe rastet e tjera”.
“Eshtë e dukshme që duhet bërë çdo gjë që duhet për të parandaluar dhe shmangur incidente të tilla sa më shumë që të jetë e mundur në sferën tonë e në territorin tonë”.
Të hënën, Kremlini denoncoi një raport të shërbimeve sekrete amerikane që thoshte se Rusia ishte përpjekur të ndikonte tek zgjedhjet amerikane në favor të Donald Trump, dhe tha se nuk ka asnjë provë që të tregojë se në këtë çështje janë përfshirë zyrtarë rusë.
Zyrtarët gjermanë thonë se Berlini po shikon mundësinë e krijimit të një dege të veçantë në zyrën qeveritare për mediat që do të vlerësojë në mënyrë specifike lajmet e rreme dhe do të hartojë një përgjigje ndaj tyre.
Por burime pranë problemit, thonë se përpjekjet në faza të hershme mund të mos rezultojnë në hapa konkretë, për shkak të shqetësimit se qeveria mund të shihet se po përpiqet të menaxhojë raportimin e lajmeve në një vit elektoral.
Kancelarja Angela Merkel, e cila kritikoi fuqishëm Rusinë për rolin e saj në Ukrainë dhe ka drejtuar vendosjen e sanksioneve ndaj Moskës, shpreson të zgjidhet për një mandat të katërt në krye të qeverisë gjermane.
Përgatiti: Juli Prifti – /tesheshi.com/
