Mbretëresha Elizabeth II ishte shënjestër e një atentati të mundshëm gjatë vizitës së saj në SHBA në vitin 1983, sipas dokumenteve të FBI-së.
Byroja Federale e Hetimit publikoi të dhënat në lidhje me udhëtimet e Elizabeth në SHBA pas vdekjes së saj vitin e kaluar. Dokumentet tregojnë se FBI, e cila ndihmoi në sigurimin e saj gjatë vizitave të saj, ishte e shqetësuar për kërcënimet e IRA-s.
Kërcënimi për ta vrarë iu “zbulua” një oficeri policie në San Francisko. Sipas të dhënave, oficeri, i cili frekuentonte një pijetore irlandeze në San Francisko, njoftoi agjentët federalë për një telefonatë që mori nga një burrë që kishte takuar atje.
Oficeri raportoi se burri i zbuloi atij se po kërkonte hakmarrje për vajzën e tij, e cila ishte “vrarë në Irlandën e Veriut nga një plumb plastik”.
Sipas BBC, kërcënimi u bë më 4 shkurt 1983, rreth një muaj para se Mbretëresha Elizabeth dhe bashkëshorti i saj Princi Philip të vizitonin Kaliforninë.
“Ai do të përpiqej të dëmtonte Mbretëreshën Elizabeth dhe do ta bënte këtë ose duke hedhur një objekt nga Ura Golden Gate mbi Royal Yacht Britannia kur ajo po kalonte poshtë tij, ose duke u përpjekur të vriste Mbretëreshën Elizabeth kur ajo po vizitonte Parkun Kombëtar Yosemite”, thuhet në dokument.
Në përgjigje të kërcënimit, Shërbimi Sekret kishte planifikuar të “mbyllte trotuaret në urën Golden Gate ndërsa jahti afrohej”. Është e paqartë se çfarë masash u morën në Yosemite, por vizita vazhdoi normalisht.
Dokumenti prej 102 faqesh u ngarkua në Vault, uebsajti i inteligjencës së FBI-së, të hënën pas një kërkese të Ligjit për Lirinë e Informacionit të paraqitur nga mediat amerikane.
Siç shpjegon BBC, shumë nga vizitat e Elizabeth në SHBA janë bërë gjatë tensioneve të rritura për shkak të situatës në Irlandën e Veriut.
Sipas dokumenteve, gjatë udhëtimit të saj në New York në vitin 1976, një pilot u citua për fluturimin e një avioni të vogël mbi Battery Park, duke mbajtur një pankartë ku shkruhej “Angli, dil nga Irlanda”. /tesheshi.com/
