Në Jindires, Afrin, në veri të Sirisë, mijëra nxënës, shkollat e të cilëve u shkatërruan nga tërmeti i 6 shkurtit, vazhdojnë shkollimin në autobusë të kthyer në klasa.
Tërmetet kanë shkaktuar shkatërrime të konsiderueshme në veriperëndim të Sirisë. Nga tragjedia është prekur veçanërisht qyteti i Jindires, i cili ndodhet në zonën e operacionit “Dega e Ullirit”.
Sipas këshillit lokal të Jindires, nga 45 shkolla ku frekuentojnë dhjetëra mijëra nxënës, 24 janë dëmtuar nga tërmeti.
Për sigurinë e nxënësve, shkollat e dëmtuara u mbyllën, ndërsa disa nga shkollat e mbetura të paprekura u shndërruan në strehimore të përkohshme për viktimat e tërmetit.
Si pasojë e tërmetit humbën jetën 600 nxënës dhe 26 mësues.
Në bashkëpunim me “Shoqatën Arsimore Portokalli”, Drejtoria e Arsimit Afrin shndërroi 22 autobusë në klasa për të siguruar që fëmijët të vazhdojnë shkollimin e tyre. Këta autobusë janë të dekoruar me përmbajtje dhe ilustrime të ndryshme edukative.
Duke shfrytëzuar bankat e vendosura në vendet e sediljeve të hequra, nxënësit tashmë vazhdojnë mësimin e ndërprerë në këto klasa të lëvizshme. Autobusët, të cilët ofrojnë shërbime të lëvizshme, ofrojnë një mundësi arsimimi për fëmijët që jetojnë në tenda të improvizuara të ngritura brenda dhe përreth qytetit pas një fatkeqësie.
Rreth 3000 nxënës nga mosha gjashtë deri në 12 vjeç përdorin këto ambiente arsimore në qytet.
Njëri prej tyre është Yakin Said, një nxënës i klasës së dytë, shkolla e të cilit u shkatërrua nga tërmeti i Jindires.
“Shkolla jonë u shkatërrua. Ne u zhvendosëm në një kamp dhe po mësojmë në këta autobusë. Ne nuk duam të humbasim të drejtën tonë për arsim,” tha Said.
Maya Halid, e cila duhej të linte shtëpinë e saj për shkak të sulmeve intensive të ushtrisë siriane në një fshat në verilindje të Hamës, tha se shkolla që ajo ndoqi ishte shkatërruar nga tërmeti.
“Ne u vendosëm në këtë kamp. Mësuesit tanë janë shumë të mirë. Ne kemi lëndë si matematika dhe gjuha arabe,” shtoi Khalid.
Tërmetet shkatërruese goditën Turqinë dhe Sirinë më 6 shkurt, duke vrarë dhjetëra mijëra njerëz dhe duke shkaktuar dëme të mëdha materiale. /tesheshi.com/
