Nga Blendi Gashi
Ndeshja e parë zyrtare e përfaqësueses së Kosovës në futboll, Finlandë – Kosovë (1-1) e vlefshme për Botërorin “Rusi 2018”, ka gëzuar tej mase jo vetëm shqiptarët e Kosovës, por edhe ata të Shqipërisë dhe më gjërë.
Megjithatë, çuditërisht kjo ndeshje historike ka shkaktuar edhe përplasje të mëdha në opinionin publik kosovar.
Arsyeja s’është pse Kosova nuk arriti të marrë 3 pikë të plota, por ka të bëj me diç krejt tjetër. Pra, ndërlidhet me politikën.
Shkaktari kryesorë që ngriti “tensionet” para dhe pas sfidës së futbollit, në Kosovë, është hiç më pak se kryetari i partisë së parë opozitare në vend, Visar Ymeri i Lëvizjes Vetëvendosje.
Kreu i VV-së para sfidave të para eliminatore për “Botërorin 2018”, i uroi fat vetëm kombëtares së Shqipërisë për sfidën ndaj Maqedonisë, por një urim të tillë çuditërisht ai nuk e bëri edhe për përfaqësuesen e Kosovës që ndeshej me Finlandën.
“Sot Kombëtarja fillon rrugëtimin drejt Botërorit 2018. Kombëtarja e bashkimit, ajo që then kufijtë, dinjitozja e fitoreve, ajo që na e dëshmon se dobësinë nuk e kemi as natyrë e as kulturë, por vetëm politikë të dëmshme. Që na e dëshmon se të ndarë as nuk jemi më mirë, e as nuk mund të jemi më mirë.
Përpara Shqipëri!”, shkroi Ymeri në profilin e tij në Facebook para ndeshjes, ndërsa nuk e pa të rrugës të thotë asnjë fjalë për përfaqësuesen e Kosovës.
Kjo gjë ka irrituar tej mase miqtë e kreut të Vetëvendosje-s në Facebook, të cilët kanë dhënë kritika të mëdha ndaj tij, ku në mesin e tyre ka pasur aktivistë të kësaj partie që kanë thënë se më nuk do të votojnë lëvizjen në fjalë dhe as nuk do të jenë pjesë e aktiviteteve të VV-së.
Një prej tyre që ka shprehur gjithë mllefin ndaj Visar Ymerit është edhe Kastriot Aliu i cili është deklaruar anëtar i VV-së.
Qytetari Aliu, përmes një postimi bërë në profilin e kreut të VV-së, ka shkruar:
“Për 300 vjet s’të votoj më. Na lodhët me këto përralla të bashkimit, me këto ideja që kena me u bashku. Ata që më thirrin në telefon, ju lutem kurr mos më thirrni më.
Kastriot Aliu, si anëtar fishmëni aty, sa ka ksi (politikan) që Kosovën nuk është në gjendje me fol asnjë fjalë, s’dua të jem pjesë ku është edhe ky”, është një pjesë e reagimit që ka bërë Kastriot Aliu .
“Visar Ymeri të kërkoijë falje për gafën e papërgjegjshme”
Por, kritika të mëdha ndaj statusit të bërë nga Visar Ymeri kanë dhënë edhe qeveritarë, analistë dhe gazetarë.
Sokol Havolli, këshilltari politik i Isa Mustafës, ka reaguar ndaj Ymerit duke thënë se ai i gëzohet zjarrit e shkrumit në Kosovë.
“Nuk është e çuditshme. S’di pse shumë prej jush i zuri në befasi kamarieri i 1998-1999, e sot ‘patrioti dhe lideri mbarëkombëtar’. Kosova i gëzohet fitores së Shqipërisë, e Shqipëria i gëzohet fitores së Kosovës. Visari i gëzohet zjarrit e shkrumit në Kosovë. Knaqnu futboll, ai është një pseudo-patriot që mendon se NATO ka ndërhy për interesa të veta!”, ka shkruar Havolli.
Analisti, Leon Duhanaj, e quan të pamoralshme se si një politikan i cili merr votat nga qytetarët e Kosovës dhe privilegjet nga shteti në fjalë nuk është në gjendje të bëj një urim për përfaqësuesen e shtetit.
“Është e pamoralshme ta injorosh shtetin nga i cili ushqehesh me të gjitha privilegjet!”, thotë Duhanaj, duke aluduar në postimin e kreut të VV-së.
Më i rreptë në reagimin e tij është shprehur gazetari, Adriatik Kelmendi, i cili thotë se për të është e pabesueshme se si kreu i partisë opozitare më të madhe në vend injoron debutimin historik të shtetit në futboll.
“Thjeshtë, sinqerisht nuk iu besova syve! U shokova!
Kryetari i partisë së tretë me të madhe në Kosovë injoron debutimin historik të Kosovës në futboll, madje edhe ndan shqiptarët.
Sipas tij vetëm Shqipëria po e meritoka kualifikimin!!!
Më falni, por nuk mund u përmbajta.
Respektin më të madh për Shqipërine, por ky (Visar Ymeri) votat i kërkon në Kosovë e jo në Shqipëri, rrogën e merr nga taksat e qytetarëve të Kosovës.
Shpresoj të kërkoje falje për këtë gafë krejt të papërgjegjshme e të panevojshme”, ka shkruar në profiling e tij në Facebook, gazetari Kelmendi.
Edi Rama uron Kosovën për golin e parë në histori
Për dallim nga Visar Ymeri i VV-së, kryeministri i Shqipërisë, Edi Rama, para ndeshje përmes një statusi ka uruar edhe kombëtaren e Shqipërisë në futboll por edhe përfaqësuesen e Kosovës:
“Urimet më të mira dhe suksese djemve të Shqipërisë e Kosovës që për pak minuta nisin rrugën e Botërorit#ForcaShqipëria #ForcaKosova”, ka shkruar Rama, para ndeshjes.
Por kryeministri shqiptar ka uruar Kosovën edhe për golin e parë zyrtar në histori si pjesë e FIFA-s në eleminatore.
“Urime Kosovës për golin e parë në historinë e saj#”, ka deklaruar Rama. /tesheshi.com/
