Duke folur mbi situatën më të fundit në Kosovë pas provokimeve nga Beogradi, kreu i Vetëvendosjes Visar Ymeri bëri përgjegjës pushtetin, atë të përfaqsuar nga trioja Thaçi, Mustafa dhe Veseli. Sipas tij, janë këta që me stilin e tyre të udhëheqjes i kanë lëshuar mjaft terren Serbisë që tani sillet ashtu siç sillet, duke iu bërë shumë dhurata, përfshirë dhe Zajednicën.
“Prandaj këta tre, me këtë mendësi, me këto synime e qëllime, duhet të largohen sa më shpejt nga pozitat e tyre institucionale, që t’i hapin rrugë Republikës së Kosovës. Zgjedhjet demokratike e ndryshimi rrënjësor i politikës institucionale, veçanërisht karshi Serbisë, janë rruga përpara. Jo ndërmarrjet a ndërhyrjet e pjesshme për interesa personale, të uzurpatorëve të Republikës. Kush më shumë e kush më pak, Thaçi, Veseli e Mustafa, dhe të tjerët si këta, kanë kontribuar herë drejtpërdrejt e herë në mënyrë indirekte në krijimin e gjendjes aktuale që e kemi”, u shpreh Ymeri.
Sipas kreut të VV-së, me të gjitha llojet e format, duke nisur që nga Lista Serbe, Zajednica, strulturat ilegale në veri, energjia dhe telekomunikacioni, muri dhe treni, Serbia synon dhe do vazhdojë të synojë pamundësinë e Kosovës për të qenë shtet sovran dhe i pavarur. Dhe në finale, për të gjitha këto Ymeri fajësoi sërish pushtetin aktual në Kosovë
“Të gjitha këto ndërhyrje Serbisë iu mundësuan nga negociatat pa kushte e pa parime dhe koncesionet e vazhdueshme ndaj saj, si rrjedhojë e po këtyre negociatave. Këto na sollën këtu ku jemi. Rruga e negociatave dhe e koncesioneve ndaj Serbisë, si dhe eksponentët kryesor të kësaj rruge, Hashim Thaçi, Kadri Veseli dhe Isa Mustafa, nuk janë zgjidhja, por problemi”, theksoi kreu i Vetëvendojes.
Më tej ai shtoi se dobësimi i vazhdueshëm i Kosovës prej çarmatosjes së UÇK-së, deri tek privatizimet e dialogu, de-industrializimi e uzurpimi i resurseve e kapaciteteve shtetërore, rrënimi ekonomik, e ka bërë atë një shtet që nuk mund të vetëmbrohet.
“Sot kur jemi të kërcënuar me luftë si asnjëherë më parë që prej vitit 1999, jemi njëkohësisht nën një regjim gllabërues të udhëhequr nga politikanë të shantazhueshëm e skajshmërisht të papërgjegjshëm ndaj të mirës së përgjithshme”, shtoi më tek Ymeri. /tesheshi.com/
