Kreu i Vetëvendosjes, Visa Ymeri ka hedhur kritika ndaj Tiranës zyrtare për atë që ai e ka konsideriar “heshtje të çuditshme” në lidhje me vdekjen e aktivistit Astrit Dehari në burgun e Prizrenit.
“Deri më tani nuk kemi pasur një reagim të tillë nga institucionet e Republikës së Shqipërisë dhe kjo është e çuditshme dhe unë do të kisha pritur që të kemi një reagim të tillë në mënyrë që të insistohet që të kemi reagim për Astritin”, tha Ymeri gjatë një interviste ne Ora News.
Sipas tij, pushteti në Kosovë po bën gjithëçka për të manipluar me vdekjen e Deharit.
“Ne duhet të dimë më së pari të vërtetën për të kuptuar edhe qëllimin e fshehjes. Që ka një investim për ta orientuar opinionin publik aty ku do pushteti dhe jo ku është e vërteta, është shumë e qartë”.
Për Ymerin, nuk ka asnjë dyshim që Dehari është viktimë e pushtetit, ku një dorë e tij ia mori jetën pasi e mbajti padrejtësisht për më shumë se dy muaj në burg. /tesheshi.com/
