Rreth 18 muaj pas shpërthimit të rasteve të të infektuarve me virusin Zika, Brazili ka shpallur fundin e gjendjes së jashtëzakonshme në sektorin e shëndetit publik.
Vendimi është marrë pasi nga janari në mes të prillit është konstatuar një rënie me 95 për qind e rasteve të infektimit me këtë virus, krahasuar kjo me të njëjtën periudhë të vitit të shkuar.
Megjithatë, Ministria e Shëndetësisë e vendit amerikanolatin bëri të ditur se dhënia fund gjendjes së jashtëzakonshme nuk nënkuptonte ndërprerjen e mbikëqyrjes apo të ndihmës për familjet e prekura nga virusi.
Alarmi për virusin Zika do të merrte përmasa globale teksa Brazili përgatitej për Lojërat Olimpike të 2016-s, me shqetësimin se ky aktivitet mund të ndihmonte në përhapjen e virusit.
Organizata Botërore e Shëndetësisë e hoqi në nëntorin e shkuar gjendjen e jashtëzakonshme në nivel ndërkombëtar, duke mos harruar të kujtojë se virusi mbetet sidoqoftë një kërcënim. /tesheshi.com/
