Virusi Zika çmohet si shumë më i rrezikshëm nga ç’mendohet

Autoritetet përkatëse braziliane të fushës kanë arritur në përfundimin se rreziqet nga virusi Zika janë shumë më të mëdha nga sa është menduar gjer më tash.

Në një raportim të BBC-së thuhet se shkencëtarët brazilianë kanë pohuar se virusi Zika mund të jetë shkak për dëmtimet neurologjike te fëmijët në gratë shtatzëna të prekura prej tij.

Kërkuesit në fushën e mjekësisë dhe pjesa më e madhe e mjekëve janë tani të një mendimi se ka një lidhje midis virusit Zika dhe mikrocefalisë, një sëmundje që i bën fëmijët të lindin me përmasa më të vogla të kokës për shkak të zhvillimit të kufizuar të trurit.

Veç faktit se një për qind e shtatzënave të prekura nga virusi do të lindin një foshnje me mikrocefali, mjekë me emër në Brazil i kanë deklaruar BBC-së se 20 për qind e tyre kanë për të patur fëmijë me forma të tjera të dëmtimit të trurit.

Me këtë virus është lidhur dhe një çrregullim i rrallë i sistemit nervor, sindromi Guillain-Barre, që mund të shkaktojë paralizë të përkohshme.

Gjithsesi, shqetësimi më i madh mbetet ndikimi i virusit te foshnja në mitër.

Ende nuk ka një vaksinë për këtë virus, pavarësisht përpjekjeve. Ndërsa ai vazhdon të përhapet në pjesë të ndryshme të Amerikës Latine, në Brazil ka një ulje të përqindjes së prekjes nga ky virus si rezultat i masave parandaluese. /tesheshi.com/