Autoritetet shëndetësore në Greqi ngritën alarmin pasi një fermer 72-vjeçar i bagëtive vdiq nga ethet hemorragjike të Krime-Kongos, një sëmundje virale e përhapur nga pickimet e rriqrave.
Burri u infektua me një rriqër dhe u shtrua në spital në Larisa, ku ia kaloi sëmundjen mjekut të tij, i cili tani duket se është në gjendje të mirë shëndetësore.
Gjithsej 25 persona janë karantinuar sepse ishin kontakte të ngushta ose infermierë që ishin në kontakt me burrin e ndjerë. Askush nuk është sëmurë, por dhjetë persona i përkasin grupeve me rrezik të lartë.
Ethet hemorragjike Krime-Kongo janë një sëmundje virale që përhapet nga pickimet e rriqrave. Është e rrallë në Evropë, por ndonjëherë shfaqet në Ballkan dhe vendet e Mesdheut.
Më shumë se 80 përqind e rasteve nuk kanë simptoma ose janë të lehta, por midis rasteve të rënda që kërkojnë shtrim në spital, rreth 30 përqind e pacientëve mund të vdesin nga sëmundja, sipas Qendrës Evropiane për Parandalimin dhe Kontrollin e Sëmundjeve (ECDC).
Simptomat mund të përfshijnë ethe, dhimbje muskujsh dhe stomaku dhe marramendje, si dhe gjakderdhje nga hunda dhe dështim të organeve, tha ECDC.
Për të parandaluar përhapjen nga personi në person, autoritetet e shëndetit publik rekomandojnë shmangien e kontaktit të ngushtë fizik me një person që mund të ketë ethe hemorragjike, veshjen e dorezave dhe pajisjeve mbrojtëse kur kujdesen për pacientët dhe larjen e duarve rregullisht. /tesheshi.com/
