Virusi “FIFA” prek sërish ‘bigët’ e Europës

Impenjimet e futbollistëve me kombëtaret e tyre nuk kanë ecur mbarë ashtu si duhet, ku shumë prej tyre janë lënduar dhe do jenë mungesa kyçe për skuadrat e tyre në kampionatet respektive. Futbollistët si Karim Benzema, Sergio Aguero, David Silva, Alvaro Morata apo David Luiz janë detyruar të largohen me barrelë nga fusha e lojës gjatë kësaj fundjave.

Real Madrid duhet t`i bëj mirë llogaritë tani pa sulmuesin e tyre Karim Benzema. Francezi u lëndua në ndeshjen miqësore që kombëtarja e tij e zhvilloi ndaj Armenisë. Po nga seleksioni, të lënduar janë larguar edhe David Silva, futbollist i Manchester Cityt dhe Alvaro Morata i Juventusit. Dy futbollistët nuk arritën ta përfundonin ndeshjen e Spanjës me Luksemburgun.

Në ndeshjet e eleminatoreve “Francë 2016” kanë mbetur të dëmtuar edhe futbollistë të tjerë si, Mario Gotze, Fabio Coentrao, Nemanja Matiç dhe Branislav Ivanoviç.

Me përfaqësueset e tyre janë lënduar edhe amerikanolatinët, Sergio Aguero dhe David Luiz, të cilët do jenë mungesë e madhe për skuadrat e tyre, Manchester City dhe Paris SG.

FIFA edhe njëherë tjetër është bërë pengesë e klubeve në mesin e kampionateve, duke i lënë ata tashmë të përgjysmuar. Mirëpo, për çdo ditë që futbollistët qëndrojnë jashtë fushave të blerta si pasojë e lëndimeve të marra me përfaqësueset e tyre, FIFA është e obliguar t`i paguajë klubet.

/tesheshi.com/