Autoriteti Kombëtar i Ushqimit njofton se ka bllokuar gjatë ditëve të fundit në Portin e Durrësit një sasi prej 387.1 ton mish, cilësuar si “i papërshtatshëm për konsum njerëzor”.
Konkretisht, AKU njofton se tre ngarkesa me sasi totale 74.946 ton “Mish Derri” me origjinë nga Kanadaja, importuar nga subjekti “FRIGO ALB shpk”, rezultuan se nuk përmbushin kërkesat ligjore të sigurisë ushqimore dhe kishin mangësi në besueshmërinë e dokumentacionit shoqërues.
Po ashtu dy ngarkesa me sasi totale 52.257 ton “Mish Viçi” me origjinë nga Brazili, importuar nga subjekti “Apetit shpk”, në rregjim tranzit në territorin e Shqipërisë me destinacion final Kosovën, rezultuan me mangësi dhe mospërputhje thelbësore në dokumentacionin shoqërues të mallit, çka e bën mallin ushqimor të importuar pa identitet të konfirmuar dhe të pasigurt për konsum.
Sipas AKU-së, gjashtë ngarkesa (152.631 ton në total) janë në proces përmbyllje praktike për kthimin ne vendin e origjinës ose asgjësim. /tesheshi.com/
