Braziliani i Real Madrid, Vinicius Junior, beson se tifozët që janë shpallur fajtorë për sjellje raciste duhet të ndalohen përjetësisht nga ndjekja e ndeshjeve, raporton Reuters.
“Nëse lëndon njerëz të tjerë, duhet të paguash. Të gjithë racistët duhet të paguajnë në një farë mënyre. Nëse u pëlqen të shikojnë futboll, ata nuk duhet të lejohen të shkelin më kurrë në stadium. Kjo do t’i bëjë ata të vuajnë pasojat dhe të mendojnë për veprimet e tyre”, tha sulmuesi i ri brazilian për TV Globo.
Vinicius ishte viktimë e abuzimit nga tifozët e Atletico Madrid muajin e kaluar. Mediat lokale raportuan se gjatë gjithë lojës u dëgjuan tinguj të imitimit të majmunit dhe thirrjet “Vinicius, vdis”.
Atletico dhe La Liga dënuan abuzimin e sulmuesit brazilian. Atlético tha gjithashtu se ata po bashkëpunojnë me autoritetet për të identifikuar abuzuesit. Prokuroria në Madrid po heton edhe rastin.
Vinicius u ofendua edhe nga presidenti i shoqatës së agjentëve të futbollit spanjoll, Pedro Castro, i cili kritikoi ashpër mënyrën e tij të festimit të golave në një emision televiziv.
“Nëse shënon një gol dhe më pas kërcen samba, shko në Sambodrom. Në fushë duhet të respektosh kolegët dhe të mos sillesh si majmun”, tha Kastro në atë emision.
Vinicius më pas lëshoi një deklaratë emocionale dy-minutëshe me video në përgjigje të asaj që ai e quajti një sharje “ksenofobike dhe raciste”, duke thënë se “nuk do të ndalojë së kërcyeri” dhe se “lumturia e një braziliani me lëkurë të errët për të qenë i suksesshëm në Evropë shqetëson shumë njerëz”.
Pele, Neymar dhe figura të tjera kryesore braziliane e mbështetën menjëherë. /tesheshi.com/
