Dy janë të veçantat e javës së tetë të kampionatit spanjoll: fitoret me shumë gola të kryesuesve, si dhe ngjeshja në kryesimin e renditjes, me gjashtë skuadra që i ndajnë tre pikë mes tyre.
Vilareali ndoqi hapin e Atletikos së Madridit, Realit të Madridit dhe Barcelonës, duke fituar tenistikisht ndaj Selta Vigos. Ndaj së njëjtës Selta Vigo që dy javë më parë fitoi ndaj Barcelonës.
Vilareali e mposhti 5-0 Selta Vigon; rezultati i tretë më i thellë i javës. Soriano shënoi dy gola që në 12 minutat e para të lojës. Bakambu e Trigueros kontribuan me golat e tyre, ashtu si Wass, që shënoi një autogol.
Rivaliteti i golave nisi të shtunën, kur fillimisht Barcelona fitoi 4-0 ndaj Deportivo la Korunjës. Atletiko e Madridit regjistroi rezultatin më të thellë të javës, pasi dërrmoi 7-1 Granadën e vendit të fundit në klasifikim. Reali i Madridit do të përgjigjej pak më vonë me një fitore 1-6 në fushën e Real Betisit.
Fitorja 2-3 e Seviljes ndaj Leganesit, dhe ajo me të njëjtat shifra, 3-2, e Atletik Bilbaos ndaj Real Sociedadit, kanë bërë që ekipet të ngjeshen në krye.
Dy ekipet e Madridit, Atletiko e Reali, kanë nga 18 pikë në vend të parë e të dytë në renditjen e La Ligës. Sevilja është e vetme në vend të tretë, me një pikë më pak. Nga 16 pikë kanë Barcelona e Vilareali, kurse 15 pikë ka Atletik Bilbao i vendit të gjashtë.
Vështirë të shohësh kaq rivalitet në kampionatin spanjoll, të ndihmuar dhe nga uljet e ngritjet e herëpashershme të Realit të Madridit dhe Barcelonës.
Interesante fundjava që vjen, me përballjet, Valencia – Barcelona, Sevilja – Atletiko e Madridit dhe Real i Madridit – Atletik Bilbao. /tesheshi.com/
