Këtë të dielë, në kuadër të Ditës Ndërkombëtare në nderim të viktimave nga aksidentet rrugore, në Tiranë është organizuar 1-minutëshi i ndalesës së çdo automjeti në kujtim të të ikurve nga kjo botë nga aksidentet.
Ishte kjo në kuadër të një fushate të ndërmarrë nga Policia e Shtetit për të sensibilizuar drejtuesit e automjeve që të respektojnë maksimalisht rregullat e qarkullimit rrugor.
Sipas burimeve policore, ka një rritje të numrit të aksidenteve e po ashtu edhe të viktimave.
Policia po tregohet e ashpër në masat e saj, por kjo nuk ka ndikuar tek ndërgjegjësimi i atyre që janë në timon. Mjaft të përmendet se vijon të mbetet i lartë numri i atyre që kapen të alkolizuar gjatë ecjes dhe, megjithëse përfundojnë si masë pas hekurave, sërish fenomeni nuk ndalet.
Në Shqipëri, viktimat nga aksidentet në 25 vite përbëjnë një bilanc të vërtetë lufte. /tesheshi.com/
