Një person ka humbur jetën në një përplasje masive zinxhirore në afërsi të qytetit Hercegsanto, që ndodhi pasditen e së shtunës, më 11 mars, në dalje nga Budapesti, njoftoi sot policia hungareze.
Një trup i pajetë është gjetur në vendin e aksidentit të ndodhur në autostradën M1 jo shumë larg Budapestit, poshtë njërës prej makinave.
43 automjete u përfshinë në përplasjen masive zinxhirore dhe 39 të plagosur, 14 në gjendje të rëndë, u transportuan në spitalet në Budapest, Djerba, Tatabánja dhe Székesfehérvár.
Në mesin e të plagosurve janë dhjetë fëmijë, ndërsa katër kanë lëndime të rënda fizike.
Nga 29 të rritur, lëndime të rënda u konstatuan në 10 persona.
Ekipet e emergjencës po pastronin rrënojat e makinave dhe kamionëve nga autostrada deri në orët e para të mëngjesit, pasi në aksident u dogjën 19 automjete. Komunikacioni në autostradën M1 është vendosur në të dy drejtimet.
Kompania hungareze që menaxhon autostradat tha se aksidenti është shkaktuar ndoshta nga një stuhi rëre që ka ulur dukshmërinë në atë pjesë të rrugës.
Një zëdhënës i operatorit të autostradës tha se ata kanë kontrolluar menjëherë pamjet e kamerave vëzhguese sapo kanë marrë informacion për aksidentin.
Ai ka thënë se në video nuk është vërejtur asgjë e çuditshme, ndërsa bëhet e ditur se në një rreze prej 20 metrash ka ndodhur një stuhi, e cila ka ngritur një sasi të madhe pluhuri.
Në atë pjesë të rrugës, disa ditë më herët po bëheshin punimet në terren, ndaj supozohet se era e fortë ka ngritur dhe dhe pluhur dhe e ka bartur në rrugë. /tesheshi.com/
