Më e pakta 40 emigrantë kanë gjetur sot vdekjen në hambarin e një anije të tejmbushur në Mesdhe, në veri të Libisë, të asfiksuar me sa duket nga tymi pasi anija nisi të marrë ujë. Siç njofton komandanti i anijes së shpëtimit, 320 të tjerë u nxorën gjallë nga e njëjta anije.
Massimo Tozzi, drejtuesi i mjetit detar që shpëtoi pjesën e mbetur të emigrantëve, tregoi se të vdekurit u gjetën në hambar “mes ujit, lëndës djegëse dhe jashtëqitjeve.”
Mes të mbijetuarve janë 45 femra dhe 3 fëmijë, ndërsa vazhdon numërimi i viktimave dhe operacioni i shpëtimit.
Gjithnjë sipas komandantit të anijes italiane, midis të mbijetuarve, gratë u gjetën duke qarë për bashkëshortët dhe fëmijët e tyre të vdekur tanimë.
Incidenti i sotëm pason një varg të pafund incidentesh të tjera ku kanë humbur jetën qindra fatkeqë që janë përpjekur të shkelin në brigjet europiane. Lindja e Mesme, Afrika dhe Azia janë rajonet nga ku mijëra njerëz kërkojnë të ikin për t’u shpëtuar luftërave dhe mjerimit.
Libia është bërë vendi nga ku nisen më së shumti emigrantët, dhe kalimi i Mesdheut përmes Libisë për në Itali ka rezultuar deri sot të jetë më tragjiku për nga numri i të mbyturve. Më së paku 2.100 emigrantë kanë gjetur vdekjen këtë vit në përpjekje për të kaluar nga brigjet libiane në Itali. Megjithatë, ky numër mund të jetë larg shifrës së vërtetë, pasi besohet që një numër anijesh të jenë mbytur pa u vënë re nga mjetet që mbikëqyrin hapësirën detare. /tesheshi.com/
