Tensioni mes Rusisë dhe Turqisë vijon të mbetet i lartë pas rrëzimit të avionit luftarak rus nga forcat turke. Pas deklarateve nga të dyja palët, herë-herë me tone kërcënuese e herë-herë me tone më të zbutura, sot autoritetet e Moskës kanë hedhur poshtë një ofertë të presidentit turk, Rexhep Tajjip Erdogan, për t’u takuar kokë më kokë me Putinin më 30 nëntor në Paris gjatë një konference ndërkombëtare mbi klimën.
Erdogani do të deklaronte se është i mundur një takim me Putinin, duke theksuar dëshirën për të shmangur ndërprerjen e bashkëpunimit mes dy shteteve.
“Mes Turqisë dhe Rusisë ka një potencial të madh për bashkëpunim. Ne nuk duam që kjo ngjarje ta dëmtojë këtë bashkëpunim të mundshëm. Vendet tona janë ato që do të dëmtohen nga kjo. Të mos e lëmë këtë të ngjasë.”
I menjëhershëm ka qenë reagimi i Kremlinit, me hedhjen poshtë të ofertës së Erdoganit për t’u takuar me Putinin.
Përpos kësaj, Rusia ka vendosur të pezullojë regjimin e lëvizjes pa viza mes dy vendeve. Lajmin e ka dhënë ministri i Jashtëm rus, Sergej Lavrov, “Ne kemi vendosur të pezullojmë regjimin pa viza mes Rusisë dhe Turqisë. Ky vendim hyn në fuqi më 1 janar.”
Udhëtimi pa viza mes Rusisë dhe Turqisë nisi të aplikohej në prill të vitit 2011, duke u mundësuar qytetarëve rusë të qëndronin në Turqi për 30 ditë pa viza, dhe e njëjta gjë vlente për turqit që vizitonin Rusinë. /tesheshi.com/
