Presidenti Gjorge Ivanov ka pranuar në takim sot Sekretarin gjeneral të OSBE-së, Lamberto Zanier. Ai edhe në këtë takim ka ripërsëritur qëndrimet e tij lidhur me Platformën e përbashkët të Partive Shqiptare si pengesë kryesore për mosdhënien e mandatit për formimin e qeverisë së re, kreut të LSDM-së, Zoran Zaev.
“Në takim janë shkëmbyer mendime për gjendjen aktuale në Maqedoni dhe sfidat me të cilat përballet shteti të shkaktuara nga kriza politike, kushtetuese dhe institucionale. Në kontekst të gjendjes aktuale, kryetari Ivanov ka përsëritur qëndrimet se ka aspekte juridike dhe politike, të cilët janë problem, por edhe parakusht për dalje nga kriza. Në lidhje me aspektin juridik, me dhënien e mandatit, theksoi se kjo është lehtë e tejkalueshme.”, thuhet në njoftimin e Kabinetit të Ivanovit.
Më tej në komunikatë thuhet se në lidhje me aspektin politik, Ivanov ka theksuar se mbetet në qëndrimin se Platforma e Tiranës duhet refuzuar dhe dënuar “ashtu si edhe përzierja në punët e brendshme të Maqedonisë, të cilat nuk ndihmojnë në përpjekjet për marrëdhënie të mira ndër fqinjësore, sigurinë dhe stabilitetin në rajon”.
Nga ana tjetër, Zanier ka shprehur shqetësimin për tensionet ndëretnike, duke apeluar tek të gjithë që të ndërmarrin hapa konstruktive për tejkalimin e krizës.
Në komunikatë qëndron se ai është dakorduar me Presidentin Ivanov se liderët e rajonit duhet të përmbahen nga retorika e dëmshme. /tesheshi.com/
