I pari Grand Slam i vitit në tenis nuk ka dhuruar ende asnjë rezultat të papritur që prej nisjes së tij dy ditë më parë.
Në Australian Open po luhen ndeshjet e raundit të dytë, ku deri më tani kanë fituese raketat më të njohura të botës së tenisit.
Paraqitje mjaft të mirë ka bërë ish-numri një i botës, zviceriani Roger Federer, që në orët e para të ditës së sotme ka mundur 3-0 amerikanin Noah Rubin, për të kaluar në raundin e tretë, ku e pret një sfidë shumë më e vështirë, ajo ndaj çekut Tomas Berdych.
Po 3-0 ka fituar dhe një tjetër zvicerian, Stan Wawrinka, i katërti në renditje. Setet ndaj amerikanit Steve Johnson janë mbyllur 6-3, 6-4 dhe 6-4, ndërsa në raundin e tretë pritet përballja me Viktor Troicki-n.
Japonezi Nishikori do të kalonte lehtësisht francezin Jeremy Chardy, në një ndeshje të përfunduar 3-0.
Një tjetër emër i njohur, francezi Jo-Wilfried Tsonga, i renditur i 12-ti, nuk i ka dhënë asnjë mundësi serbit Dusan Lajovic, duke e mposhtur 3-0.
Nga takimet e raundit të dytë, pritet me interes përballja e nesërme mes Rafa Nadal-it dhe qipriotit Marcos Baghdatis. Serbi Djokovic do të ketë po më datë 19 janar një përballje me uzbekistanasin Denis Istomin. Stepanek – Goffin është gjithashtu një sfidë interesante që pret të luhet.
Te femrat, fituesja e vitit të shkuar, si dhe numri një në botë, Angelique Kerber, bëri një paraqitje jobindëse në fitoren 2-1 ndaj patriotes gjermane Carina Witthoeft. Fitorja qe e vështirë për numrin një, që në raundin e tretë do të ndeshet me çeken Kristyna Pliskova.
E papërmbajtshme Venus Williams, që e ka kaluar raundin e dytë me një fitore të padiskutueshme, 2-0, ndaj zvicerianes Stefanie Voegele. Kinezja Ying-Ying Duan do të jetë kundërshtarja për të në raundin e tretë. /tesheshi.com/
