Me Berishën në portë, Atalanta është skuadra e momentit në kampionatin italian.
Ndaj Xhenovës që kishte mundur të martën Milanin 3-0, Atalanta mori të njëjtin rezultat, duke i mposhtur xhenovezët po aq sot: 3-0!
Ecuri e jashtëzakonshme për Atalantën në muajin tetor. Skuadra ka luajtur pesë takime, ka fituar katër e ka barazuar një prej tyre.
Etrit Berisha, i kthyer në titullar të padiskutueshëm, ka pësuar vetëm një gol në këto pesë takime!
Rezultat pozitiv arriti dhe Empoli, ku ka nisur të aktivizohet rregullisht Frederik Veseli, mbrojtësi i përfaqësueses shqiptare.
Pa gola, 0-0, përfundoi takimi ndaj Romës. Veseli luajti gjatë gjithë lojës, e u ndëshkua me karton të verdhë në minutën e 11-të.
Peskara pësoi një tjetër humbje, këtë herë në “San Siro”, ku u mund 1-0 nga Milani. Memushaj u aktivizua në 90 minutat, kurse Manaj u fut në lojë në minutën e 77-të. /tesheshi.com/
