Eliminimi i Anglisë nga Islanda në Euro 2016 vazhdon të zërë vend kryesor në median sportive, posaçërisht në atë britanike.
Gary Lineker, një ish-sulmues i kombëtares angleze, e tani komentator dhe analist sportiv, ka folur për radion e BBC-së, duke e shpjeguar humbjen poshtëruese ndaj Islandës me mungesën e fuqisë mendore të lojtarëve, e me nivelin jo të kënaqshëm teknik.
“Ka një shkallë mungese të forcës mendore, e cila mbase vjen nga një mungesë e suksesit në turnetë e fundit dhe nga presioni që ushtrohet mbi ekipin anglez.”
Por kur vjen puna te presioni, Lineker mendon se ai nuk është një justifikim, pasi pritshmëritë janë më të pakta se në përfaqësueset e tjera.
“Por mos mendoni për një çast se ka më shumë presion mbi ekipin anglez se mbi ekipin spanjoll, mbi ekipin gjerman apo italian. Pritshmëritë në këto vende janë mët ë larta se në vendin tonë.”
Sa u përket lojtarëve, ja çfarë thotë Lineker, “Ata duhet ta dinë saktësisht në fushë se cila është puna e tyre, se ç’mendohet të bëjnë në rrethana të caktuara. Nuk jam i sigurt se ngjau kështu.”
Për t’iu kthyer edhe një herë temës së forcës mendore, ai thekson: “Forca mendore vjen në të vërtetë nga vetëbesimi. Vjen nga të fituarit, e kjo vlen për të gjitha sportet.”
Lineker nuk është për përzgjedhjen e një trajneri të huaj. Ai e vë gishtin mes anglezëve që mund të ulen në stolin e përfaqësueses te Glenn Hoddle. “Ai është një nga trajnerët më të mirë të Anglisë,” thotë ish-sulmuesi 55-vjeçar.
Gareth Southgate mendohet të jetë trajneri i përkohshëm i anglezëve pas dorëheqjes së Roy Hodgson-it. Southgate është aktualisht në drejtim të kombëtares së lojtarëve nën 21 vjeç. /tesheshi.com/
