Nën një marrëveshje armëpushimi të ndërmjetësuar nga Turqia dhe Rusia, që prej ditës së djeshme vazhdon evakuimi i njerëzve nga pjesa lindore e Halepit; një marrëveshje evakuimi që do ta lejojë qeverinë siriane ta marrë plotësisht nën kontroll qytetin pas vitesh të tëra lufte.
Ministri i Jashtëm turk, Mevlyt Çavushogllu, ka bërë të ditur sot se autokolona e tretë e evakuimit, e përbërë nga 16 autobusë dhe 8 mikrobusë, ka lënë lindjen e Halepit.
Mijëra civilë dhe kryengritës janë ende në pritje për t’u evakuuar, ndërsa operacioni mundet të kërkojë ditë të tëra.
“Janë nxjerrë rreth 3.000 civilë dhe më shumë se 40 të plagosur, përfshirë fëmijë. Askush nuk e di sa njerëz janë lënë në lindje. Evakuimi mund të marrë ditë,” raportoi pas nisjes së dy autokolonave të para drejtuesja e Komitetit Ndërkombëtar për Kryqin e Kuq në Siri, Marianne Gasser.
Të evakuuarit janë dërguar fillimisht në një zonë të sigurt në Idlib, prej nga më të lënduarit janë përcjellë për në Turqi.
Ndërkaq, Ministria ruse e Mbrojtjes, jep këtë të premte një shifër më të fryrë të të evakuuarve. Al Jazeera njofton se dikasteri rus flet për 6.000 të evakuuar gjat 24 orëve të fundit, 3.000 prej të cilëve janë kryengritës.
Evakuimi i civilëve dhe i kryengritësve nisi një muaj pas fillimit të ofensivës së forcave qeveritare siriane për marrjen e të gjithë Halepit. /tesheshi.com/
