Paraqitjet pozitive të kombëtares kuqezi në Europian duket se kanë patur efekt te klubet shqiptare, që tani ngjan t’i shohin më pa droje kundërshtarët e tyre në aktivitetet europiane, pavarësisht emrit të tyre.
Partizani do të zinte vendin e Skënderbeut në kualifikueset e kësaj vere në Champions League, por pakkush mendonte se rrugëtimi i kryeqytetasve do të ishte i gjatë, pasi kundërshtari ishte një emër tepër i njohur, edhe pse me shkëlqim të humbur.
Kualifikimi ndaj Ferencvaroshit hungarez cilësohej një mision gati i pamundur, por ja që Partizani ka bërë mrekullinë.
Takimi i parë, i luajtur në Elbasan, pati përfunduar 1-1, një rezultat jo favorizues për Partizanin. Mirëpo të kuqtë do t’ia dilnin t’i mbyllnin 90 minutat e dyta me të njëjtat shifra mbrëmë në “Groupama Arena” të Budapestit.
Golat kanë ardhur të dy nga hungarezët. Gera ka shënuar në minutën e 14-të me 11-metërsh, e drejt fundit të pjesës së parë Hüsing ka realizuar një autogol fantastik. Rezultati 1-1 në fund të takimit ka çuar në shtesat 15-minutëshe, që nuk kanë ndryshuar asgjë.
Dhe radha u ka ardhur penalltive për të përcaktuar fituesin në raundin e dytë kualifikues të Champions League-s. Protagonist këtu bëhet portieri Alban Hoxha, që veç faktit që shënon vetë pas një ekzekutimi të mrekullueshëm, pret po ashtu tre prej gjuajtjeve të hungarezëve.
Mposhtja e hungarezëve 3-1 pas gjuajtjes së 11-metërshave vulos triumfin e Partizanit. Një sukses domethënës për skuadrën nënkampione të Shqipërisë, që tani duhet të mendojë për atë që vjen pas. Akoma më i vështirë është kundërshtari i radhës. Në turin e tretë kualifikues të Champions League-s, Partizani do të ndeshet me austriakët e Salzburgut, një skuadër shumë më e fortë dhe e përgatitur. /tesheshi.com/
